اردو ورلڈ کینیڈا ( ویب نیوز ) اسرائیلی وزیراعظم نیتن یاہو نے لبنان کی مزاحمتی تحریک حزب اللہ کے سربراہ حسن نصر اللہ کی ہلاکت کو اسرائیلی حملے میں ایک تاریخی موڑ قرار دیا۔غیر ملکی میڈیا رپورٹس کے مطابق اسرائیلی وزیراعظم نیتن یاہو کچھ عرصہ قبل نیویارک کا دورہ مکمل کرنے کے بعد واپس اسرائیل پہنچے جس کے بعد انہوں نے حسن نصر اللہ پر حملے اور ان کی ہلاکت کے حوالے سے بیان جاری کیا۔اسرائیلی وزیراعظم نے حسن نصراللہ کی موت کو ایک تاریخی موڑ قرار دیتے ہوئے کہا کہ اسرائیل نے ان گنت اسرائیلیوں اور کئی غیر ملکی شہریوں کی ہلاکت کے ذمہ داروں کا بدلہ لیا ہے۔
نیتن یاہو نے کہا کہ میں نے اس حملے کی ہدایت کی جس میں حسن نصراللہ کو نشانہ بنایا گیا۔ حالیہ دنوں میں حزب اللہ پر حملے کافی نہیں تھے۔اسرائیلی وزیر اعظم نے کہا کہ اسرائیل کے اہداف کے حصول کے لیے حسن نصر اللہ کو ختم کرنا ضروری تھا، ہم اپنے دشمنوں پر حملے جاری رکھنے کے لیے پرعزم ہیں۔واضح رہے کہ حزب اللہ کے سربراہ حسن نصراللہ جمعے کو لبنان کے دارالحکومت بیروت میں اسرائیلی حملے میں شہید ہوگئے تھے۔ہفتے کے روز حزب اللہ نے اپنے رہنما کی شہادت کی تصدیق کرتے ہوئے کہا کہ اسرائیل کے خلاف جنگ جاری رہے گی، غزہ اور فلسطین کی حمایت اور لبنان کے دفاع کے لیے اپنا جہاد جاری رکھیں گے۔
