اردوورلڈکینیڈا( ویب نیوز)چیئرمین فیڈرل بورڈ آف ریونیو (ایف بی آر) راشد محمود لنگڑیال نے بتایا ہے کہ وزیراعظم شہباز شریف نے تنخواہ دار طبقے کے لیے ٹیکس ریٹ کم کرنے کی ہدایت جاری کر دی ہے۔ اس فیصلے کے بعد آئندہ مالی سال کے بجٹ میں تنخواہ دار افراد کے لیے ٹیکس میں رعایت فراہم کرنے کے لیے اقدامات شروع کر دیے گئے ہیں۔

راشد محمود لنگڑیال نے کہا کہ وزیراعظم نے بڑی کمپنیوں پر عائد سپر ٹیکس میں بھی کمی کرنے کی ہدایت دی ہے، اور اس حوالے سے حکومتی سطح پر مشاورت جاری ہے۔ انہوں نے مزید کہا کہ حکومت مرحلہ وار بڑی کمپنیوں اور کاروبار پر سپر ٹیکس کم کرنے اور آخرکار اسے ختم کرنے کی پالیسی پر غور کر رہی ہے۔

چیئرمین ایف بی آر نے واضح کیا کہ سپر ٹیکس میں ممکنہ کمی یا خاتمے کے سلسلے میں عالمی مالیاتی ادارے (آئی ایم ایف) کے ساتھ بھی بات چیت کی جائے گی۔ اس کا مقصد ملک میں سرمایہ کاری کے مواقع بڑھانا اور کاروباری ماحول کو مزید سازگار بنانا ہے۔

انہوں نے یہ بھی بتایا کہ ٹیکس کی شرح میں کمی کا دارومدار براہ راست ٹیکس دہندگان کی تعداد اور ٹیکس کی ادائیگی کی شرح پر ہوگا۔ جتنی زیادہ تعداد میں لوگ ٹیکس ادا کریں گے، اتنی ہی زیادہ رعایت دی جا سکے گی۔