اردوورلڈکینیڈا( ویب نیوز)ضلع خیبر کی وادی تیراہ میں سیکورٹی فورسز کے آپریشن کے دوران 4 خوارج دہشت گرد ہلاک جب کہ 3 جوان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ضلع خیبر کی وادی تیراہ میں تین مقامات پر آپریشن کیا۔
آئی ایس پی آر کے مطابق کارروائیوں کے دوران سیکیورٹی فورسز اور خوارج کے درمیان شدید فائرنگ کا تبادلہ ہوا، فائرنگ کے تبادلے میں 4 خوارج ہلاک جب کہ سیکیورٹی فورسز کے 3 جوان شہید ہوگئے۔
حوالدار انعام گل شہید
37 سالہ حوالدار انعام گل شہید کا تعلق ضلع میانوالی سے ہے، حوالدار انعام گل شہید نے پاک فوج میں 15 سال 6 ماہ تک ملک کی خدمت کی، حوالدار انعام گل شہید نے اپنے پیچھے والدین، اہلیہ اور بہن بھائی چھوڑے ہیں۔
سپاہی محمد عمران شہید
سپاہی محمد عمران شہید کی عمر 29 سال ہے اور وہ ڈسٹرکٹ ٹانک کا رہائشی ہے۔ سپاہی محمد عمران شہید نے پاک فوج میں 9 سال ملک کی خدمت کی۔
سپاہی محمد الطاف خان شہید
سپاہی محمد الطاف خان شہید کی عمر 22 سال ہے، ان کا تعلق ضلع مردان سے ہے، سپاہی محمد الطاف خان شہید نے 2 سال تک ملک کے دفاع کا فریضہ سرانجام دیا، سپاہی محمد الطاف خان شہید نے اپنے پیچھے والدین اور ایک بہن چھوڑی ہے۔