اردو ورلڈ کینیڈا ( ویب نیوز )پاک فوج کے شعبہ تعلقات عامہ کا کہنا ہے کہ سکیورٹی فورسز نے تربت کے علاقے ہوشاب روڈ پر انٹیلی جنس کی بنیاد پر کی گئی کارروائی میں 3 دہشت گردوں کو ہلاک کردیا۔

آئی ایس پی آر کے مطابق علاقے کی مسلسل نگرانی کرکے دہشت گردوں کے ٹھکانے کی نشاندہی کی گئی، سیکیورٹی فورسز کو ہیلی کاپٹر کے ذریعے دہشت گردوں کے ٹھکانے تک پہنچایا گیا

جب کہ دہشت گردوں کے فرار ہونے کے تمام راستے مکمل طور پر بند کرد ئیے گئے۔
ترجمان پاک فوج کا کہنا ہے کہ سیکورٹی فورسز کے آتے ہی دہشت گردوں نے فائرنگ کردی، فائرنگ کے تبادلے میں 3 دہشت گرد مارے گئے، کارروائی کے دوران بڑی تعداد میں گولہ بارود اور اسلحہ برآمد کرلیا گیا۔
آئی ایس پی آر نے مزید کہا کہ فورسز قوم کی حمایت سے بلوچستان کے امن، استحکام اور ترقی کو سبوتاژ کرنے کی ہر کوشش کو ناکام بنانے کے لیے پرعزم ہیں۔