اردوورلڈکینیڈا( ویب نیوز)خیبر پختونخوا میں اپوزیشن جماعتیں وزارتِ اعلیٰ کے لیے متفقہ امیدوار لانے میں مشکلات کا شکار ہیں۔ ذرائع کے مطابق مسلم لیگ (ن) اپنا امیدوار لانے کی خواہش رکھتی ہے، جب کہ جمعیت علمائے اسلام (ف) بھی اس عہدے کے لیے متحرک ہے۔ اپوزیشن اتحاد کے قیام کے لیے مختلف سیاسی رہنماؤں کے درمیان رابطے تیز ہو گئے ہیں۔
ذرائع کا کہنا ہے کہ قائد حزبِ اختلاف آج جمعیت علمائے اسلام (ف) کے سینئر رہنماؤں سے ملاقات کریں گے تاکہ مشترکہ امیدوار پر اتفاقِ رائے قائم کیا جا سکے۔ گزشتہ روز بھی اپوزیشن لیڈر نے گورنر خیبر پختونخوا اور مولانا عطاالرحمان سے سیاسی مشاورت کی تھی۔ اپوزیشن کی خواہش ہے کہ تمام جماعتیں مشاورت کے بعد ایک ہی متفقہ امیدوار کے نام پر اتفاق کریں۔
ادھر مستعفی وزیرِاعلیٰ علی امین گنڈا پور نے آج شام اہم اجلاس طلب کر لیا ہے۔ اجلاس میں پی ٹی آئی کے اراکینِ اسمبلی اور پارٹی رہنماؤں کو مدعو کیا گیا ہے، جو وزیراعلیٰ ہاؤس میں منعقد ہوگا۔ توقع ہے کہ علی امین گنڈا پور اجلاس سے الوداعی خطاب کریں گے۔
ذرائع کے مطابق علی امین گنڈا پور گزشتہ روز اپنے آبائی علاقے ڈیرہ اسماعیل خان روانہ ہونے والے تھے تاہم قریبی ساتھیوں کے مشورے پر انہوں نے جانے کا فیصلہ مؤخر کر دیا۔ وہ آج خطاب کے بعد باضابطہ طور پر روانہ ہوں گے۔
یاد رہے کہ وکیل سلمان اکرم راجہ نے گزشتہ دنوں تصدیق کی تھی کہ عمران خان نے علی امین گنڈا پور سے وزارتِ اعلیٰ کا استعفیٰ طلب کر کے سہیل آفریدی کو نیا وزیرِاعلیٰ نامزد کیا ہے۔
