اردوورلڈ کینیڈا( ویب نیوز)اسلام آباد ہائی کورٹ نے پی ٹی آئی رہنما شبلی فراز کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔
اسلام آباد ہائی کورٹ کے جسٹس طارق محمود جہانگیری نے شبلی فراز کی بیرون ملک جانے پر پابندی سے متعلق درخواست پر سماعت کی، شبلی فراز اپنے وکیل کے ہمراہ عدالت میں پیش ہوئے۔
درخواست گزار کے وکیل نے سماعت کے دوران موقف اختیار کیا کہ شبلی فراز کے خلاف 4 ایف آئی آرز ہیں اور وہ تمام میں ضمانت پر ہیں۔
جسٹس طارق محمود جہانگیری نے سرکاری وکیل سے استفسار کیا کہ اب مسئلہ کیا ہے؟ جس پر سرکاری وکیل نے جواب دیا کہ ہم عدالت کے حکم پر عمل کریں گے۔
اسلام آباد ہائی کورٹ کے جسٹس طارق محمود جہانگیری نے ریمارکس دیئے کہ وزارت داخلہ اور ڈی جی پاسپورٹ عدالت کو مطمئن نہیں کر سکے، شبلی فراز کا نام ایک ہفتے میں ای سی ایل سے نکال کر رپورٹ عدالت میں پیش کی جائے۔
عدالت نے حکم دیا کہ ڈی جی پاسپورٹ اور ڈی جی ایف آئی اے عملدرآمد رپورٹ پیش کریں۔
49
