اردوورلڈ کینیڈا( ویب نیوز)حکومت نے نفرت انگیز اور مذہبی اشتعال انگیز مواد کو روکنے کے لیے سوشل میڈیا پر سخت نگرانی کا حکم دیا ہے۔
وفاقی حکومت نے سوشل میڈیا کی کڑی نگرانی کے لیے چاروں صوبوں سمیت آزاد جموں و کشمیر اور گلگت بلتستان کے چیف سیکریٹریز اور آئی جی پولیس کو مراسلہ جاری کردیا۔
وزارت داخلہ کے جوائنٹ سیکرٹری فاٹا کی جانب سے جاری مراسلہ میں کہا گیا ہے کہ سوشل میڈیا پر نفرت انگیز مواد کی گردش اور مذہبی اشتعال انگیزی کے واقعات میں اضافہ ہوا ہے۔ اس طرح کی سرگرمیاں ملک میں فرقہ وارانہ تقسیم کو ظاہر کرتی ہیں اور ان سے اشتعال انگیزی کے واقعات میں اضافہ ہونے کا خدشہ ہے۔
پوسٹ کے مطابق سوشل میڈیا پر گردش کرنے والے نفرت انگیز اور گستاخانہ مواد کی وجہ سے ملک کو عسکریت پسندی کی ایک نئی لہر کا سامنا ہے۔ موجودہ حالات کے پیش نظر ملک کسی فرقہ وارانہ فساد کا متحمل نہیں ہو سکتا۔ اشتعال انگیز تقریر کرنے والوں بشمول تمام فرقہ پرست تنظیموں اور سوشل میڈیا اور عسکریت پسندی سے وابستہ عناصر کی کڑی نگرانی کو یقینی بنایا جائے۔
مراسلہ میں مزید کہا گیا ہے کہ محرم الحرام کے دوران شعلہ بیان علماءکے اضلاع میں داخلے اور بیان پر پابندی عائد کرتے ہوئے انہیں متعلقہ اضلاع تک محدود کیا جائے۔