اردوورلڈکینیڈا(ویب نیوز)اوٹاوا کی لائٹ ریل ٹرانزٹ سروس کے بیشتر گاڑیوں کے یونٹس ایک نئے تکنیکی مسئلے کے سامنے آنے کے دو ہفتے سے زائد عرصے بعد بھی بند ہیں، جس کے باعث مسافروں کو شدید مشکلات کا سامنا ہے۔
او سی ٹرانسپو کی جانب سے 6 فروری کو جاری کردہ تازہ اپ ڈیٹ کے مطابق اب تک 20 ٹرینیں مرمت کے بعد بحال کی جا چکی ہیں، جو گزشتہ ہفتے کے مقابلے میں صرف دو زیادہ ہیں۔ اس کے برعکس 61 ٹرینیں اب بھی سروس سے باہر ہیں، جبکہ حکام کا کہنا ہے کہ کم از کم 13 فروری تک مزید 20 گاڑیاں دستیاب ہو سکتی ہیں۔یہ تعداد اب بھی لائن 1 پر رش کے اوقات میں سروس برقرار رکھنے کے لیے درکار 26 ٹرینوں سے کم ہے۔
او سی ٹرانسپو نے بیان میں کہا کہ م تسلیم کرتے ہیں کہ لائن 1 پر موجودہ سروس ہمارے معیار یا مسافروں کی توقعات پر پوری نہیں اترتی۔ صلاحیت کو محفوظ طریقے سے بحال کرنے پر کام جاری ہے، جبکہ مینٹیننس کی ذمہ داری رکھنے والے ادارے سے جوابدہی بھی لی جا رہی ہے۔”
او-ٹرین اس وقت صبح اور شام کے اوقات میں تین سے چار منٹ کے وقفے سے چل رہی ہے۔ او سی ٹرانسپو کے مطابق اہم اسٹیشنز، جیسے بے ویو اور یو اوٹاوا پر عملہ تعینات کیا گیا ہے تاکہ مسافروں کی رہنمائی کی جا سکے، تاہم رش کے اوقات میں پلیٹ فارمز پر ہجوم میں نمایاں کمی نہیں آ سکی۔
او سی ٹرانسپو کا کہنا ہے کہ جیسے جیسے ٹرینیں ٹھیک ہوتی جائیں گی، انہیں دوبارہ فلیٹ میں شامل کر لیا جائے گا، تاہم تمام گاڑیوں کی مرمت میں کتنا وقت لگے گا، یہ تاحال واضح نہیں۔
رائیڈو ٹرانزٹ گروپ نے 21 جنوری کو کارٹریج بیئرنگ اسمبلی میں ایک نیا مسئلہ شناخت کیا تھا، جس کے بعد حفاظتی خدشات کے پیش نظر متعدد ٹرینیں سروس سے ہٹا لی گئیں اور نتیجتاً ٹرینوں کی تعداد کم ہو گئی۔
جاری تحقیقات کے دوران یہ بھی سامنے آیا کہ کئی ٹرینوں کے مکینزم میں اسپالنگ پائی گئی ہے، یعنی ایکسل کے اندر دھات کے باریک ذرات ٹوٹ کر الگ ہو رہے ہیں، جس سے وقت کے ساتھ گڑھے بنتے ہیں۔
میمو کے مطابق اگر اس مسئلے کو بروقت حل نہ کیا جائے تو اس سے دراڑیں پڑ سکتی ہیں اور بیئرنگ فیل ہونے کا خطرہ بڑھ جاتا ہے۔
رپورٹ میں واضح کیا گیا ہے کہ یہ مسئلہ ایکسل بیئرنگ اسمبلی کے پہلے سامنے آنے والے مسئلے سے الگ نوعیت کا ہے۔ رائیڈو ٹرانزٹ گروپ اس بات کی بھی جانچ کر رہا ہے کہ آیا اس نئے نقص کا تعلق سابقہ مسائل سے بنتا ہے یا نہیں۔
شہر، ٹرانسپورٹیشن ریسورس ایسوسی ایٹس اور رائیڈو ٹرانزٹ گروپ کے درمیان مشاورت کے بعد فیصلہ کیا گیا کہ متاثرہ ٹرینوں کو اس وقت تک سروس سے باہر رکھا جائے گا جب تک متعلقہ یونٹس مکمل طور پر تبدیل نہیں کر دیے جاتے۔
