اردو ورلڈ کینیڈا ( ویب نیوز)لاہور میں موسلادھار بارش کے باعث قومی ایئرلائن (پی آئی اے) کا طیارہ بھارتی فضائی حدود میں داخل ہوگیا۔

سول ایوی ایشن اتھارٹی (سی اے اے) کے ذرائع نے بتایا کہ پی آئی اے کی پرواز پی کے 248 سعودی شہر دمام سے لاہور آرہی تھی کہ تیز بارش کے باعث لاہور ایئرپورٹ پر لینڈ نہیں کر سکی۔
سی اے اے ذرائع کا کہنا ہے کہ شدید بارش کے باعث پرواز لاہور ایئرپورٹ سے ملتان کی طرف موڑ رہی تھی کہ کپتان بھارتی فضائی حدود میں داخل ہو گئے۔
ذرائع کا کہنا ہے کہ کپتان نے بھارتی فضائی حدود میں داخلے سے متعلق بھارتی ایوی ایشن حکام کو آگاہ کیا اور انہوں نے پرواز کا رخ موڑنے کے لیے بھارتی فضائی حدود استعمال کرنے کی اجازت دے دی، جس کے بعد کپتان کو ملتان ایئرپورٹ کی طرف موڑنے کی ہدایت کی گئی۔ ذرائع کا مزید کہنا ہے کہ بعد ازاں پرواز ملتان ایئرپورٹ پر بحفاظت لینڈ کر گئی۔