جن میں دو طرفہ تعلقات کو مزید مستحکم کرنے اور تجارت سمیت مختلف شعبوں میں تعاون بڑھانے پر اتفاق کیا گیا۔وزارتِ خارجہ کی جانب سے جاری بیان کے مطابق اسحاق ڈار نے ڈھاکا میں بنگلہ دیشی مشیر برائے امورِ خارجہ محمد توحید حسین سے تفصیلی ملاقات کی۔ ملاقات نہایت خوشگوار ماحول میں ہوئی جس میں اعلیٰ سطحی روابط، تجارت اور اقتصادی تعاون، عوامی روابط، ثقافتی تبادلے، تعلیم اور ہنر مندی میں شراکت داری اور انسانی بنیادوں پر مسائل کے حل سمیت کئی اہم موضوعات پر گفتگو کی گئی۔اس موقع پر دونوں رہنماؤں نے علاقائی اور عالمی امور پر بھی تبادلہ خیال کیا، جن میں **سارک کی بحالی، فلسطین کا مسئلہ اور روہنگیا بحران  شامل تھے۔ دونوں ممالک نے اس بات پر زور دیا کہ باہمی تعاون کو نئی بلندیوں تک پہنچانے کے لیے مشترکہ کوششیں جاری رکھی جائیں گی۔

قبل ازیں اسحاق ڈار نے وفاقی وزیر برائے تجارت جام کمال خان کے ہمراہ بنگلہ دیشی مشیر برائے تجارت شیخ بشیرالدین سے ملاقات کی، جس میں دوطرفہ تجارت، سرمایہ کاری اور معاشی تعلقات پر تفصیلی تبادلہ خیال کیا گیا۔ اس اجلاس میں بنگلہ دیش کے اہم سرکاری عہدیداران اور کاروباری اداروں کے سربراہان بھی شریک تھے، جن میں گورنر بنگلہ دیش بینک، بنگلہ دیش انویسٹمنٹ ڈویلپمنٹ اتھارٹی کے ایگزیکٹو چیئرمین، ٹریڈنگ کارپوریشن کے چیئرمین، سول ایوی ایشن اتھارٹی کے سربراہ، ایکسپورٹ پروموشن بیورو کے قائم مقام نائب چیئرمین اور وزارتِ تجارت و ہوا بازی کے سیکریٹریز شامل تھے۔

فریقین نے نہ صرف موجودہ تجارتی تعلقات پر اطمینان کا اظہار کیا بلکہ مستقبل میں سرمایہ کاری اور اقتصادی تعاون کو مزید بڑھانے کے عزم کا اعادہ بھی کیا۔ اس موقع پر اسحاق ڈار نے کہا کہ پاکستان بنگلہ دیش کے ساتھ تعلقات کو قدر کی نگاہ سے دیکھتا ہے اور انہیں مزید فروغ دینے کا خواہاں ہے۔یہ ملاقاتیں اس امر کی عکاسی کرتی ہیں کہ پاکستان اور بنگلہ دیش تعلقات کے ایک نئے دور میں داخل ہو رہے ہیں، جہاں دونوں ممالک نہ صرف اقتصادی بلکہ سماجی اور ثقافتی شعبوں میں بھی ایک دوسرے کے ساتھ مزید قریب آنے کے خواہاں ہیں۔