اردو ورلڈ کینیڈا ( ویب نیوز)پاکستان اور ناروے نے بالخصوص تجارت، سرمایہ کاری، ترقی اور دیگر شعبوں میں تعاون کو مزید مضبوط اور متنوع بنانے کے لیے مشترکہ کوششیں جاری رکھنے پر اتفاق کیا ہے۔
یہ سمجھوتہ نیویارک میں وزیر خارجہ بلاول بھٹو زرداری اور ناروے کے وزیر خارجہ Anniken Huitfeldt کے درمیان ملاقات میں ہوا۔
انہوں نے پاکستان اور یورپی فری ٹریڈ ایسوسی ایشن کے درمیان آزاد تجارتی معاہدے کے جلد از جلد تکمیل کی اہمیت پر زور دیا۔
بلاول بھٹو زرداری نے امید ظاہر کی کہ ناروے کی مزید کمپنیاں پاکستان کی پرکشش سرمایہ کاری پالیسی سے مستفید ہوں گی۔
انہوں نے پاکستانیوں کے لیے قانونی نقل مکانی کے مواقع بڑھانے کی اہمیت پر زور دیا۔
بلاول بھٹو زرداری نے اقوام متحدہ کی سلامتی کونسل کی قراردادوں کے مطابق جموں و کشمیر کے تنازع کے پرامن حل کی ضرورت پر بھی زور دیا۔
وزیر خارجہ بلاول نے امریکی نمائندہ خصوصی برائے افغانستان تھامس ویسٹ سے بھی ملاقات کی اور اس بات پر زور دیا کہ پرامن، مستحکم اور خوشحال افغانستان پاکستان کی ترجیح ہے۔
ایف ایم نے افغانستان اور اس سے باہر دیرپا امن اور استحکام کے لیے عبوری افغان حکومت کے ساتھ بین الاقوامی رابطے جاری رکھنے کی اہمیت پر زور دیا۔
امریکی نمائندہ خصوصی نے افغانستان میں امن و استحکام کے لیے پاکستان کی کوششوں کو سراہا۔
