اردو ورلڈ کینیڈا ( ویب نیو ز ) حکومت نے ورلڈ کپ کے لیے قومی کرکٹ ٹیم کو بھارت بھیجنے کا فیصلہ کرلیا۔

ترجمان دفتر خارجہ کا کہنا ہے کہ پاکستان نے آئندہ آئی سی سی ورلڈ کپ 2023 میں شرکت کے لیے اپنی کرکٹ ٹیم بھارت بھیجنے کا فیصلہ کیا ہے۔

ترجمان نے کہا کہ پاکستان نے ہمیشہ اس بات پر زور دیا ہے کہ کھیلوں کو سیاست سے نہیں ملانا چاہیے اور بھارت کے ساتھ دوطرفہ تعلقات بین الاقوامی کھیلوں میں رکاوٹ نہیں بننا چاہیے۔ترجمان نے کہا کہ پاکستان کا فیصلہ اس کے تعمیری اور ذمہ دارانہ رویے کو ظاہر کرتا ہے جب کہ بھارت کا رویہ ہمیشہ جانبدارانہ رہا ہے، بھارت نے ایشیا کپ کے لیے اپنی ٹیم پاکستان بھیجنے سے انکار کر دیا تھا۔ترجمان دفتر خارجہ کا مزید کہنا تھا کہ پاکستان کو اپنی کرکٹ ٹیم کی سیکیورٹی پر گہری تشویش ہے۔