اردوورلڈکینیڈا( ویب نیوز)چمن کے سرحدی علاقے اسپن بولدک میں پاک فوج نے علی الصبح افغان طالبان اور فتنہ الخوارج کے دہشتگردوں کی جانب سے کیے گئے حملوں کو مؤثر جوابی کارروائی کے ذریعے پسپا کر دیا۔ سیکیورٹی ذرائع کے مطابق دہشتگردوں نے تین مختلف مقامات پر بیک وقت حملے کیے جن کا بھرپور جواب دیا گیا۔
ذرائع کے مطابق حملہ آوروں نے عام شہریوں اور قریبی دیہات کو ڈھال کے طور پر استعمال کیا، تاہم پاک فوج کی فوری اور بھرپور جوابی کارروائی کے نتیجے میں 15 سے 20 دہشتگرد مارے گئے۔
مزید بتایا گیا کہ دہشتگردوں نے افغانستان کی حدود سے پاک افغان دوستی گیٹ کو بھی دھماکے سے تباہ کیا، جو اس بات کا ثبوت ہے کہ افغان طالبان تجارتی سرگرمیوں اور عوامی نقل و حرکت کے مخالف ہیں۔
سیکیورٹی حکام کے مطابق گزشتہ شب کرم سیکٹر پر بھی افغان طالبان اور فتنہ الخوارج کے دہشتگردوں نے حملے کی کوشش کی تھی، جسے پاک فوج نے ناکام بنا دیا۔ جوابی کارروائی میں آٹھ دشمن پوسٹیں اور چھ ٹینک عملے سمیت تباہ کر دیے گئے، جبکہ متعدد دہشتگرد ہلاک ہوئے اور بڑی مقدار میں امریکی ساختہ اسلحہ قبضے میں لے لیا گیا۔
ذرائع کے مطابق اس وقت کرم سیکٹر میں حالات مکمل طور پر قابو میں ہیں، تاہم اسپن بولدک کے اطراف مزید دہشتگردوں کی نقل و حرکت کی اطلاعات موصول ہو رہی ہیں
