اردو ورلڈ کینیڈا ( ویب نیوز)چیف آف آرمی سٹاف جنرل عاصم منیر نے سکیورٹی کی صورتحال بہتر بنانے اور دہشت گردوں کو انجام تک پہنچانے کے عزم کا اظہار کرتے ہوئے کہا کہ پاک فوج دہشت گردوں کے سہولت کاروں سے گٹھ جوڑ کو بھی توڑ دے گی۔
پاک فوج کے شعبہ تعلقات عامہ کے مطابق چیف آف آرمی اسٹاف جنرل سید عاصم منیر نے ان خیالات کا اظہار میران شاہ، شمالی وزیرستان اور تربیلا کے دورے کے دوران کیا۔ انہوں نے مادر وطن کے دفاع میں اپنی جانوں کے نذرانے پیش کرنے والے بہادر سپاہیوں کو خراج عقیدت پیش کیا۔
دورے کے دوران آرمی چیف کو فیلڈ کمانڈرز کی جانب سے علاقے میں سیکیورٹی کی تازہ ترین صورتحال اور دہشت گردی کے خاتمے پر بریفنگ دی گئی جس کے بعد آرمی چیف نے پاک افغان سرحد پر تعینات فرنٹ لائن دستوں کے افسران اور جوانوں سے بھی ملاقات کی۔
جنرل سید عاصم منیر نے جوانوں کی پیشہ ورانہ مہارت، بلند حوصلے اور آپریشنل تیاریوں کی تعریف کی اور کہا کہ سماجی و اقتصادی ترقی کے ذریعے دیرپا امن کو یقینی بنایا جا سکتا ہے۔
انہوں نے کہا کہ پاک فوج سیکیورٹی کی صورتحال کو بہتر بنانے اور دہشت گردوں کو ان کے انجام تک پہنچانے اور ان کے سہولت کاروں کے ساتھ گٹھ جوڑ توڑنے کے لیے پرعزم ہے۔
آئی ایس پی آر کے مطابق آرمی چیف نے کہا کہ پاک فوج قربانیوں سے حاصل ہونے والے امن کو مستحکم کرے گی کیونکہ خطے میں امن پاکستانی قوم اور قانون نافذ کرنے والے اداروں کی عظیم قربانیوں سے ممکن ہوا ہے۔
