صدر مملکت ڈاکٹر عارف علوی نے گوادر میں پاک فوج کے قافلے پر حملے کی مذمت کرتے ہوئے میانوالی میں سیکیورٹی فورسز کی جانب سے دہشت گردوں کے حملے کو ناکام بنانے پر اطمینان کا اظہار کیا ہے۔
ڈاکٹر عارف علوی نے گوادر حملے میں قیمتی جانوں کے ضیاع پر گہرے افسوس کا اظہار کرتے ہوئے شہداء کو اپنی جانوں کے نذرانے پیش کرنے پر خراج تحسین پیش کیا ہے۔
انہوں نے شہداء کے اہل خانہ سے ہمدردی کا اظہار کیا اور درجات کی بلندی کے لیے دعا بھی کی۔
اس کے علاوہ صدر پاکستان نے میانوالی میں تربیتی ایئر بیس پر حملے کی بھی مذمت کی اور سیکیورٹی فورسز کی جانب سے دہشت گرد حملے کو ناکام بنانے پر اطمینان کا اظہار کیا۔
ڈاکٹر عارف علوی نے کہا کہ دہشت گرد ملک و قوم کے دشمن ہیں، ان کے مکمل خاتمے کے لیے کوششیں جاری رکھیں گے، افواج پاکستان ملک سے دہشت گردی کی لعنت کے خاتمے کے لیے کوشاں ہیں۔
