اردو ورلڈ کینیڈا ( ویب نیوز )آج ملک بھر میں یوم پاکستان قومی جوش و جذبے سے منایا جا رہا ہے، سیاسی و مذہبی جماعتوں کے زیراہتمام یوم پاکستان کے موقع پر سیمینارز اور کانفرنسز کا انعقاد اور ریلیاں نکالی جائیں گی لور جرات کی لازوال داستان رقم کرنے والوں کو خراج عقیدت پیش کیا جائے گا
یوم پاکستان 23 مارچ 1940 کو آل انڈیا مسلم لیگ کی طرف سے منظور کی گئی اس قرارداد کی یاد میں منایا جاتا ہے جس کی روشنی میں برصغیر کے مسلمانوں نے اپنے لیے ایک علیحدہ وطن کا خواب دیکھا تھا۔
یہ قرارداد لاہور کے منٹو پارک میں پیش کی گئی جہاں ان کی یادگار کے طور پر مینار پاکستان بنایا گیا تھا۔
نماز فجر کے اجتماعات میں ملک و قوم کی سلامتی اور استحکام کے لیے خصوصی دعائیں مانگی گئیں جب کہ دیگر مذاہب کے ماننے والوں کی عبادت گاہوں میں بھی خصوصی دعائیہ تقریبات کا اہتمام کیا جائے گا۔
دن کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے ہوا۔ آج مزار اقبال پر گارڈز کی تبدیلی کی پروقار تقریب ہوگی اور پاک فضائیہ کے چاک چوبند گارڈز کی ذمہ داریاں سنبھالیں گے۔
لاہور میں واہگہ بارڈر پر پرچم کشائی کی خصوصی تقریب ہوگی جس میں ملک بھر سے شائقین شرکت کریں گے، پاکستان رینجرز پنجاب اور بی ایس ایف انڈیا کے درمیان مٹھائی اور تحائف کا تبادلہ بھی ہوگا۔
یاد رہے کہ کفایت شعاری پالیسی کے تحت اسلام آباد میں پاک فوج کی روایتی پریڈ محدود پیمانے پر ایوان صدر میں ہوگی۔
