اردو ورلڈ کینیڈا (ویب نیوز) ایشیا کپ ٹی ٹوئنٹی کے سپر فور مرحلے میں 182 رنز کے ہدف کے تعاقب میں پاکستان نے بھارت کو سنسنی خیز مقابلے کے بعد پانچ وکٹوں سے شکست دے دی۔
پاکستان ٹیم بھارت کے خلاف ہدف ایک گیند پر پہلے ہی حاصل کر لیا ، قومی ٹیم نے متحدہ عرب امارات کی سرزمین پر دوسری بار ٹی ٹوئنٹی میں سب سے زیادہ رنز بنانے کا اعزاز حاصل کیا۔
پاکستان نے بیٹنگ شروع کی تو کپتان بابر اعظم 14 رنز اور فخر زمان 15 رنز بنانے کے بعد پویلین لوٹ گئے جس کے بعد محمد رضوان اور محمد نواز کے درمیان 73 رنز کی شراکت قائم ہوئی جس نے ٹیم کی فتح کو یقینی بنایا۔ محمد نواز کے 42 رنز پر آؤٹ ہونے کے بعد محمد رضوان بھی 71 رنز بنا کر آؤٹ ہوئے۔
خوشدل شاہ اور آصف علی کے درمیان 33 رنز کی شراکت قائم ہوئی لیکن یہاں آصف علی 16 رنز بنا کر آؤٹ ہوئے۔ 20ویں اوور کی پانچویں گیند پر افتخار احمد نے دو رنز بنا کر ٹیم کو فتح سے ہمکنار کرایا۔
