اردوورلڈ کینیڈا( ویب نیوز)وزیر اعظم شہباز شریف نے کہا ہے کہ پاکستان عالمی برادری کے ساتھ مل کر دہشت گردی کا نشانہ بننے والوں کے ساتھ اظہارِ یکجہتی کرتا ہے۔ ان کے مطابق پاکستان کے عوام، مسلح افواج اور قانون نافذ کرنے والے اداروں نے اس جنگ میں ہمیشہ صفِ اول کا کردار ادا کیا ہے۔
دہشت گردی کے متاثرین کو خراجِ عقیدت پیش کرنے کے عالمی دن کے موقع پر اپنے پیغام میں انہوں نے کہا کہ یہ دن قومی جذبے کا عکاس ہے۔ پاکستانی قوم نے دہشت گردی کا مقابلہ جرات، عزم اور بے پناہ قربانیوں سے کیا اور دشمنوں کے تمام عزائم ناکام بنائے۔
وزیر اعظم نے بتایا کہ پاکستان نے عالمی دہشت گردی کے خلاف جنگ میں 90 ہزار سے زائد جانوں کی قربانی دی اور اس دوران ملکی معیشت کو بھی بھاری نقصان اٹھانا پڑا۔ ملک کے ہر علاقے میں گلیاں، بازار اور تعلیمی ادارے اس تلخ جدوجہد کی کہانی سناتے ہیں۔
انہوں نے کہا کہ دہشت گردی نے اگرچہ معاشرے کو غم و دکھ دیا لیکن ہماری بہادری کی داستانیں فخر کا باعث ہیں۔ نوجوان نسل آج بھی قومی سلامتی اور اقدار کی حفاظت کے عزم پر پروان چڑھ رہی ہے۔
شہباز شریف کا مزید کہنا تھا کہ ریاست، عوام اور سکیورٹی ادارے متحد ہو کر اس ناسور کو جڑ سے ختم کرنے کی جدوجہد کر رہے ہیں۔ ضربِ عضب، ردالفساد اور دیگر آپریشنز کے ذریعے دہشت گردوں کے عزائم کو بار بار ناکام بنایا گیا ہے
