اردوورلڈکینیڈا( ویب نیوز)پاکستان بھاری اکثریت سے اقوامِ متحدہ کی انسانی حقوق کونسل (UNHRC) کا رکن منتخب ہو گیا ہے، جس کی مدتِ رکنیت تین سال ہوگی۔ یہ کامیابی عالمی سطح پر پاکستان کے فعال اور مثبت کردار کا اعتراف قرار دی جا رہی ہے۔

وزیراعظم شہباز شریف نے اپنے پیغام میں کہا کہ پاکستان کا اقوامِ متحدہ کی انسانی حقوق کونسل میں منتخب ہونا اس کے مؤثر اور ذمہ دار عالمی کردار کی واضح عکاسی کرتا ہے۔ انہوں نے کہا کہ پاکستان انسانی حقوق کے تحفظ اور فروغ کے لیے عملی اقدامات جاری رکھے گا اور عالمی سطح پر انصاف اور برابری کے اصولوں کی پاسداری کے لیے سرگرم رہے گا۔

نائب وزیرِ اعظم اسحاق ڈار نے سوشل میڈیا پلیٹ فارم ایکس پر جاری بیان میں کہا کہ اقوامِ متحدہ کے رکن ممالک نے پاکستان پر اپنے اعتماد کا اظہار کیا ہے، جو انسانی حقوق کے فروغ میں ہماری مستقل کاوشوں کا ثبوت ہے۔

اقوامِ متحدہ میں پاکستان کے مستقل مندوب عاصم افتخار نے اس موقع پر کہا کہ یہ کامیابی نہ صرف انسانی حقوق کے فروغ بلکہ جمہوری اقدار کے احترام اور بین الاقوامی سطح پر تعاون کے فروغ میں پاکستان کے مثبت کردار کا اعتراف ہے۔