اردوورلڈ کینیڈا( ویب نیوز)پاکستان تحریک انصاف نے الیکشن ترمیمی ایکٹ سپریم کورٹ میں چیلنج کر دیا۔چیئرمین پاکستان تحریک انصاف بیرسٹر گوہر علی خان نے سپریم کورٹ میں آئینی درخواست دائر کردی، جس میں وفاق اور الیکشن کمیشن کو فریق بنایا گیا ہے۔
پاکستان تحریک انصاف نے درخواست میں موقف اختیار کیا ہے کہ تحریک انصاف نے مخصوص نشستوں کی فہرستیں الیکشن کمیشن میں جمع کرادی ہیں، 12 جولائی کے فیصلے کے بعد مخصوص نشستوں پر تحریک انصاف کا حق ہے۔
درخواست میں سپریم کورٹ سے الیکشن ترمیمی ایکٹ کو کالعدم قرار دینے کی استدعا کی گئی ہے۔
پی ٹی آئی نے درخواست میں استدعا کی ہے کہ الیکشن ترمیمی ایکٹ کو غیر آئینی اور غیر قانونی قرار دیا جائے اور الیکشن کمیشن کو دیگر سیاسی جماعتوں کو مخصوص نشستیں الاٹ کرنے سے فوری روکا جائے۔
درخواست میں عدالت سے یہ بھی استدعا کی گئی ہے کہ تحریک انصاف کو خواتین اور غیر مسلموں کی مخصوص نشستیں الاٹ کرنے کا حکم دیا جائے۔