اردو ورلڈ کینیڈا ( ویب نیوز ) قومی اسمبلی سیکرٹریٹ اور سپیکر کے موقف کے بعد پاکستان تحریک انصاف کے ارکان نے اپنا فیصلہ تبدیل کر لیا اور اب ارکان اسمبلی تحریری حکم نامے کی روشنی میں ہی قومی اسمبلی میں آئیں گے۔

پارٹی ذرائع کا کہنا ہے کہ قومی اسمبلی سیکرٹریٹ نے عدالت کے تحریری حکم تک پی ٹی آئی ارکان کو اجلاس میں آنے سے روکنے کا کہا ہے۔

ذرائع کے مطابق پی ٹی آئی ارکان قومی اسمبلی میں اسی صورت میں واپس آئیں گے جب استعفوں کا معاملہ معطل ہونے کی بجائے کالعدم ہو جائے گا۔

قومی اسمبلی سیکرٹریٹ کے فیصلے کے بعد پی ٹی آئی کے سابق ارکان پارلیمنٹ لاجز واپس چلے گئے۔

واضح رہے کہ گزشتہ روز لاہور ہائی کورٹ نے پی ٹی آئی کے 43 ارکان قومی اسمبلی کو ڈی نوٹیفائی کرنے کے الیکشن کمیشن کے فیصلے کو معطل کرتے ہوئے عدالت نے ان حلقوں میں ضمنی انتخابات بھی روک دیے ہیں۔

دوسری جانب قومی اسمبلی کا اجلاس کورم پورا نہ ہونے کے باعث غیر معینہ مدت کے لیے ملتوی کردیا گیا ہے۔