اردوورلڈ کینیڈا(ویب نیوز)بلدیاتی انتخابات کی تیاریوں کے لیے سیاسی جماعتیں میدان میں آنے لگیں، پاکستان تحریک انصاف نے بلدیاتی انتخابات کے لیے کمیٹی تشکیل دے دی۔
الیکشن کمیشن نے بلدیاتی انتخابات کی تیاریوں میں تیزی لائی تو سیاسی جماعتوں نے بھی کمر کس لی۔
پنجاب حکومت بھی نیا بلدیاتی نظام بنا کر قانون کا مسودہ اسمبلی میں لانے کے لیے متحرک ہو گئی ہے جب کہ پیپلز پارٹی کے ساتھ ساتھ تحریک انصاف نے بھی بلدیاتی انتخابات کی تیاریاں شروع کر دیں۔
تحریک انصاف لاہور نے بلدیاتی انتخابات کے لیے کمیٹی بنا دی، رکن پنجاب اسمبلی شیخ امتیاز محمود کمیٹی کے کنوینر جب کہ ایم پی اے فرخ جاوید کو کنوینر ہوں گے۔
حافظ ذیشان رشید، عاطف خان میو، وقار طور، حاجی فیاض بھی کمیٹی کے ارکان میں شامل ہیں جبکہ میاں ندیم، چوہدری ندیم، ملک قیصر اور شیخ ذوالفقار علی بھی کمیٹی کا حصہ ہوں گے۔
کمیٹی کا مقصد یونین کونسل کی سطح پر بلدیاتی انتخابات کی تیاری اور انتظامات کرنا ہے۔
پی ٹی آئی لاہور کے صدر چوہدری اصغر نے بھی کمیٹی کی تشکیل کا نوٹیفکیشن جاری کر دیا ہے۔