اردوورلڈ کینیڈا( ویب نیوز)پاک فوج کے ترجمان لیفٹیننٹ جنرل احمد شریف چوہدری نے حالیہ بیان میں بھارت کو واضح پیغام دیتے ہوئے کہا ہے کہ "نہ بھارت اسرائیل ہے اور نہ پاکستان فلسطین”۔ انہوں نے بھارت کو متنبہ کیا کہ اگر اس نے جارحیت کی تو پاکستان کا ردعمل "وحشیانہ” ہوگا۔ انہوں نے مزید کہا کہ پاکستان کبھی بھی بھارتی بالادستی کے آگے نہیں جھکے گا، اور بھارت کو یہ بات جتنی جلدی سمجھ آئے، علاقائی امن اور دنیا کے لیے اتنا ہی بہتر ہوگا۔
یہ بیان اس وقت سامنے آیا ہے جب حالیہ دنوں میں بھارت اور پاکستان کے درمیان کشیدگی میں اضافہ ہوا ہے۔ بھارت نے پہلگام میں ہونے والے دہشت گرد حملے کے بعد پاکستان کے مختلف علاقوں میں دہشت گردی کے مبینہ ٹھکانوں پر فضائی حملے کیے، جن میں پاکستان کے مطابق درجنوں شہری جاں بحق ہوئے۔ پاکستان نے ان حملوں کو "بزدلانہ” قرار دیتے ہوئے فوری جوابی کارروائی کی، جس میں بھارت کے پانچ جنگی طیارے مار گرائے گئے اور درجنوں ڈرون تباہ کیے گئے۔
انہوں نے واضح کیا کہ کشمیر ایک بین الاقوامی تسلیم شدہ تنازعہ ہے اور بھارت اس مسئلے کو حل کرنے کے بجائے جبر سے اندرونی مسئلہ بنانے کی کوشش کر رہا ہے۔
لیفٹیننٹ جنرل احمد شریف چودھری نے خبردار کیا کہ ہم امن پسند لوگ ہیں، اگر بھارت نے ہمیں اکسایا یا حملہ کیا تو ہمارا ردعمل تیز اور وحشیانہ ہوگا، حقیقت یہ ہے کہ بھارت امریکہ نہیں اور پاکستان افغانستان نہیں ہے، بھارت اسرائیل نہیں ہے اور پاکستان فلسطین نہیں ہے، پاکستان، بھارتی تسلط کے سامنے نہیں جھکے گا۔
انہوں نے کہا کہ بھارت کو یہ حقیقت جتنی جلدی سمجھ آ جائے، وہ اتنا ہی علاقائی اور عالمی امن کیلئے اچھا ہوگا۔
