اردو ورلڈ کینیڈا ( ویب نیوز ) بین الاقوامی کھیلوں کی دنیا میں کھیل کے جذبے اور باہمی احترام کی ایک خوبصورت مثال سامنے آئی ہے
جہاں سمیر خان نامی پاکستانی باکسر نے ایک ایونٹ کے دوران اعلیٰ اسپورٹس مین اسپرٹ کا مظاہرہ کرتے ہوئے سب کے دل جیت لیے۔ سوشل میڈیا پر وائرل ہونے والی ویڈیو میں دیکھا جا سکتا ہے کہ مقابلے کے دوران بھارت کا جھنڈا زمین پر گر گیا تھا، جسے سمیر خان نے فوراً اٹھا کر نہایت احترام کے ساتھ میز پر رکھ دیا۔یہ واقعہ چند ماہ قبل ایک بین الاقوامی باکسنگ ایونٹ کے دوران پیش آیا تھا، تاہم حال ہی میں اس کی ویڈیو منظر عام پر آنے کے بعد تیزی سے وائرل ہو گئی۔ ویڈیو میں سمیر خان کا یہ عمل نہ صرف کھیل کے اعلیٰ اخلاقی معیار کو ظاہر کرتا ہے بلکہ دونوں ممالک کے درمیان کشیدہ تعلقات کے باوجود باہمی احترام اور رواداری کا پیغام بھی دیتا ہے۔
کھیلوں کے ماہرین اور سوشل میڈیا صارفین کی بڑی تعداد نے اس اقدام کو سراہتے ہوئے کہا کہ حقیقی اسپورٹس مین وہی ہوتا ہے جو میدان میں مقابلہ ضرور کرے، مگر دل میں احترام اور انسانیت کو برقرار رکھے۔ سمیر خان کے اس عمل نے یہ ثابت کیا کہ کھیل محض جیت اور ہار کا نام نہیں بلکہ یہ انسانوں کو قریب لانے اور مثبت پیغام دینے کا ذریعہ بھی ہے۔اس واقعے نے پاکستان کے مثبت تشخص کو اجاگر کیا ہے اور دنیا کو یہ دکھایا ہے کہ پاکستانی کھلاڑی کھیل کو صرف مقابلہ نہیں بلکہ امن، احترام اور بھائی چارے کا ذریعہ سمجھتے ہیں۔ سمیر خان کی اس مثال کو نہ صرف کھیلوں کے حلقوں میں بلکہ عام عوام کی جانب سے بھی بھرپور پذیرائی حاصل ہو رہی ہے۔
