اردو ورلڈ کینیڈا ( ویب نیوز ) ملک بھر میں 78 واں یوم آزادی ملی جوش و جذبے سے منایا جا رہا ہے ، پاکستان کے چھوٹے بڑے شہروں میں رات 12 بجے یوم آزادی کا استقبال بڑے جوش و خروش سے کیا گیا۔
شہری سڑکوں پر نکل آئے، ماحول ’’پاکستان زندہ باد‘‘ کے نعروں سے گونج اٹھا، چھوٹی بڑی ریلیاں اور مختلف ثقافتی شوز کا انعقاد کیا گیا، شہریوں نے قومی ترانوں اور ڈھول کی تھاپ پر بھنگڑے ڈالے۔آج صبح کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے ہوا جب کہ مساجد میں ملکی استحکام اور خوشحالی کے لیے دعائیں کی گئیں۔یوم آزادی کے موقع پر ملک بھر میں سرکاری و رہائشی عمارتوں، شاہراہوں، سڑکوں اور مختلف مقامات کو برقی قمقموں سے سجایا گیا جب کہ رات 12 بجے آسمان آتش بازی سے رنگوں اور روشنیوں سے جگمگا اٹھا۔
شہروں میں ریلیاں، جلوس اور میوزیکل شوز کا انعقاد بھی کیا گیا، جب کہ بچے اور بڑے قومی پرچم، بیجز لے کر گھروں سے باہر نکل آئے اور ’’پاکستان زندہ باد‘‘ کے نعرے لگائے۔یوم آزادی کے موقع پر ملک بھر میں تقریبات کا انعقاد کیا جائے گا جس میں بانیان پاکستان کی عظیم جدوجہد کو خراج تحسین پیش کرتے ہوئے ملک کے دفاع اور معیشت کو مضبوط بنانے کے عزم کا اظہار کیا جائے گا۔یوم آزادی کی مرکزی تقریب مزار قائد پر گارڈز کی تبدیلی ہوگی جس کے بعد مختلف سیاسی و سماجی شخصیات مزار قائد پر حاضری دیں گی تاکہ قائد محمد علی جناح کی جدوجہد کو خراج تحسین پیش کیا جاسکے۔اسلام آباد کے پریڈ گراؤنڈ میں آج دفاعی نمائش کا انعقاد کیا جائے گا جس میں عوام کو داخلے کی اجازت ہوگی۔قوم نے اس عزم کا اعادہ کیا ہے کہ اگر بھارت نے کسی قسم کی جارحیت کی تو اسے متحد اور بھرپور جواب دیا جائے گا۔اس کے علاوہ دنیا بھر میں مقیم پاکستانی بھی 78 ویں یوم آزادی قومی جوش و جذبے سے منائیں گے جب کہ سفارت خانوں میں بھی خصوصی تقریبات کا انعقاد کیا جائے گا۔
