اردو ورلڈ کینیڈا ( ویب نیوز ) پاکستان کی اسکواش کھلاڑی مہوش علی پر ایشین اسکواش فیڈریشن نے چھ ماہ کی پابندی عائد کر دی ہے۔
پاکستان سکواش فیڈریشن نامناسب رویے کے خلاف تادیبی کارروائی بھی کرے گی۔بین الاقوامی مقابلوں میں پاکستان کی نمائندگی کرنے والی مہوش علی پر شکست کے بعد حریف کی جانب فحش اشارہ کرنے پر پابندی عائد کر دی گئی ہے۔یہ بات قابل ذکر ہے کہ مہوش علی نے جنوبی کوریا میں منعقدہ 32ویں ایشین جونیئر اسکواش چیمپئن شپ کے گرلز انڈر 17 ایونٹ کے راؤنڈ 16 میں سیڈ 5 ہانگ کانگ کی چانگ وائی لی سے ہارنے کے بعد نامناسب سلوک کیا تھا۔مہوش علی نے حریف کھلاڑی کی طرف فحش اشارہ کیا اور ہاتھ ملانے سے بھی انکار کردیا۔
دریں اثنا، بار بار رابطہ کرنے اور صورتحال کے بارے میں جاننے کے لیے پیغامات چھوڑنے کی کوششوں کے باوجود مہوش علی کے والد اور کوچ عارف علی نے کوئی جواب نہیں دیا۔دوسری جانب ذرائع کے مطابق پاکستان سکواش فیڈریشن نے بھی مہوش علی کے خلاف تادیبی کارروائی کا عندیہ دے دیا ہے۔
