اردو ورلڈ کینیڈا ( ویب نیوز ) فلسطینی مزاحمتی تنظیم حماس نے چار اسرائیلی یرغمالیوں کی لاشیں ریڈ کراس کے حوالے کر دی ہیں۔

غیر ملکی خبر رساں ادارے کے مطابق حماس کے ایک اہلکار نے بتایا کہ چار اسرائیلیوں کی لاشیں کچھ عرصہ قبل ریڈ کراس کے حوالے کی گئی تھیں اور اب فلسطینی قیدی ان کی رہائی کے منتظر ہیں۔حماس کے عسکری ونگ القسام بریگیڈ کے ترجمان ابو عبیدہ نے ہلاک ہونے والے یرغمالیوں کی شناخت ظاہر کی ہے جنہیں اسرائیل کے حوالے کیا گیا تھا۔ابو عبیدہ کے مطابق یہ لاشیں یرغمالیوں کی ہیں جن کا نام اتزاہی عیدان، اتزیک الجاریت، اوہد یحلومی اور شلومو منصور ہے۔ادھر ایک اسرائیلی سکیورٹی اہلکار نے بھی خبر رساں ایجنسی کو تصدیق کی ہے کہ حماس نے چار لاشیں ریڈ کراس کے حوالے کر دی ہیں۔معاہدے کے تحت اسرائیل اب 620 فلسطینی قیدیوں کی رہائی کا منتظر ہے۔
خیال رہے کہ گزشتہ ہفتے قیدیوں کی رہائی پر پیدا ہونے والے بحران کے حل کے لیے حماس اور اسرائیل نے مزید 4 مغویوں کی لاشوں کے بدلے 620 فلسطینی قیدیوں کو رہا کرنے پر اتفاق کیا تھا۔عرب میڈیا کے مطابق 600 سے زائد فلسطینی قیدیوں کو رہا کیا جائے گا جنہیں گزشتہ ہفتے رہا کیا جانا تھا لیکن اسرائیل نے انہیں روک دیا تھا۔