اردو ورلڈ کینیڈا ( ویب نیوز ) پارلیمنٹ کو اپنے آئینی حقوق کے مکمل تحفظ اور دفاع کا حق حاصل ہے ،وفاقی وزیر اطلاعات مریم اورنگزیب کا کہنا ہے کہ پارلیمنٹ اپنے اختیارات کے تحفظ کے لیے آخری حد تک جائے گی۔

اپنے بیان میں مریم اورنگزیب نے کہا کہ قانون سازی کے ذریعے شفاف اور منصفانہ نظام دیا گیا ہے اپنے آئینی اختیارات کے تحفظ کے لیے آخری حد تک جائیں گے۔ قانون سازی کا آئینی اختیار کوئی نہیں چھین سکتا۔
انہوں نے کہا کہ عدلیہ کا اختیار آئین اور قانون کی تشریح کرنا ہے۔ یہ عدلیہ کا اختیار نہیں ہے کہ وہ ‘حق’ اختیار کرے یا مقننہ کی طاقت کو محدود کرے۔
وفاقی وزیر نے کہا کہ پارلیمنٹ نے وکلا برادری، بار کونسلز اور ایسوسی ایشنز کے دیرینہ مطالبے پر قانون سازی کی، آرٹیکل 184-3 سے متعلق قانون سازی سے عدلیہ کے اختیار، آزادی اور خودمختاری میں کوئی کمی نہیں آئی لیکن اب سپریم کورٹ کے تین سینئر ججز مشاورت سے یہ اختیار استعمال کریں گے۔