اردوورلڈ کینیڈا( ویب نیوز)پنجاب کی وزیرِ اعلیٰ مریم نواز شریف نے کہا ہے کہ پارلیمانی نظام جمہوریت کا بنیادی ستون اور ریاست کی حقیقی طاقت ہے۔ بین الاقوامی پارلیمانی دن کے موقع پر اپنے پیغام میں انہوں نے واضح کیا کہ پارلیمنٹ صرف قانون سازی کا ادارہ نہیں بلکہ ایک معتبر ادارہ ہے جو قوم کے فکری رویوں، حکمتِ عملی اور مستقبل کا تعین کرتا ہے۔

انہوں نے مزید کہا کہ پارلیمانی نظام شفافیت، عوام کی نمائندگی اور جوابدہی کو یقینی بناتا ہے۔ انھوں نے قومی و صوبائی اسمبلیوں کے ارکان کو سراہتے ہوئے کہا کہ پارلیمانی اداروں کی مضبوطی کے لیے ہر فرد اور ہر ادارے کا فعال کردار ضروری ہے۔
مزید برآں، مریم نواز نے کہا کہ ایک مضبوط پارلیمنٹ انسانی حقوق کے تحفظ کے لیے ناگزیر ہے۔ انہوں نے عوامی شمولیت کی اہمیت پر زور دیتے ہوئے کہا کہ جمہوریت کی طاقت پارلیمانی اداروں کی مضبوطی میں مضمر ہے۔
انہوں نے یہ بھی اعلان کیا کہ پنجاب اسمبلی میں پارلیمانی ڈیویلپمنٹ یونٹ اور ریسرچ سینٹر قائم کیا گیا ہے، تاکہ اسمبلی کے اراکین کو جمہوری اصولوں کے مطابق معاونت فراہم کی جا سکے۔