اردو ورلڈ کینیڈا ( ویب نیوز ) ٹی ٹوئنٹی ورلڈکپ: پتھم نسانکا کے ہوا میں اڑتے کیچ نے میچ کا پانسہ پلٹ دیا، سری لنکا سپر ایٹ میں پہنچ گیا
ٹی ٹوئنٹی ورلڈکپ کے تیسویں میچ میں سری لنکا نے سنسنی خیز مقابلے کے بعد آسٹریلیا کو شکست دے کر سپر ایٹ مرحلے میں شاندار انداز میں رسائی حاصل کرلی۔ پالیکیلے میں کھیلے گئے اس اہم میچ میں ہیرو کا کردار پتھم نسانکا نے ادا کیا جنہوں نے فیلڈنگ اور بیٹنگ دونوں شعبوں میں غیرمعمولی کارکردگی دکھائی۔سری لنکا نے ٹاس جیت کر آسٹریلیا کو پہلے بیٹنگ کی دعوت دی، تاہم ابتدا میں یہ فیصلہ غلط ثابت ہوتا دکھائی دیا۔ آسٹریلوی اوپنرز نے جارحانہ کھیل پیش کرتے ہوئے صرف 8.3 اوورز میں 104 رنز کی شراکت قائم کر ڈالی۔ اس مرحلے پر ایسا محسوس ہو رہا تھا کہ اسکور 200 سے تجاوز کر جائے گا۔
Catch of the Tournament pic.twitter.com/WVASAUJf9n
— Fahim Akhtar Malik (@writetofahim) February 16, 2026
جب Glenn Maxwell کریز پر موجود تھے تو آسٹریلیا ایک بڑے مجموعے کی جانب بڑھ رہا تھا۔ میکسویل نے روایتی انداز میں ریورس شاٹ کھیلنے کی کوشش کی، مگر پوائنٹ پر موجود پتھم نسانکا نے ہوا میں ڈائیو لگاتے ہوئے ناقابل یقین کیچ تھام لیا۔ اس شاندار کیچ نے نہ صرف میکسویل کی اننگز کا خاتمہ کیا بلکہ آسٹریلیا کی بڑی اسکور کی امیدوں پر بھی پانی پھیر دیا۔کرکٹ ماہرین اور شائقین اس کیچ کو ٹورنامنٹ کا بہترین کیچ قرار دے رہے ہیں۔ اس لمحے نے میچ کا رخ مکمل طور پر سری لنکا کے حق میں موڑ دیا۔
شاندار کم بیک کرتے ہوئے سری لنکن بولرز نے وقفے وقفے سے وکٹیں حاصل کیں اور پوری ٹیم کو 181 رنز پر آل آؤٹ کردیا۔ ابتدائی جارحانہ آغاز کے باوجود آسٹریلیا آخری اوورز میں رفتار برقرار نہ رکھ سکا۔ہدف کے تعاقب میں پتھم نسانکا نے ذمہ دارانہ اور جارحانہ بیٹنگ کا حسین امتزاج پیش کیا۔ انہوں نے ناقابل شکست سنچری اسکور کرتے ہوئے ٹیم کو باوقار فتح دلائی۔ ان کی اننگز نے نہ صرف سری لنکا کو سپر ایٹ مرحلے میں پہنچایا بلکہ آسٹریلیا کو ایونٹ سے باہر ہونے کے دہانے پر لاکھڑا کیا۔
