اردو ورلڈ کینیڈا ( ویب نیوز ) دنیا کے امیر ترین شخص اور ٹیسلا و اسپیس ایکس کے مالک ایلون مسک نے دولت اور خوشی سے متعلق ایک ایسا بیان دے دیا ہے

جس نے سوشل میڈیا پر نئی بحث چھیڑ دی ہے۔ ایلون مسک کا کہنا ہے کہ بے پناہ دولت کے باوجود خوشی کو خریدا نہیں جا سکتا، اور یہ حقیقت وہی لوگ بہتر طور پر سمجھتے ہیں جو خود اس مقام تک پہنچ چکے ہوں۔
عالمی خبر رساں اداروں کے مطابق ایلون مسک نے یہ بات سوشل میڈیا پلیٹ فارم ایکس (سابق ٹوئٹر) پر ایک مختصر مگر معنی خیز پوسٹ میں کہی۔ انہوں نے لکھا کہ “یہ جملہ بالکل درست ہے کہ دولت خوشی نہیں خرید سکتی، اور جس شخص نے یہ کہا تھا وہ اچھی طرح جانتا تھا کہ وہ کیا کہہ رہا ہے۔”
ایلون مسک کا یہ بیان ایسے وقت میں سامنے آیا ہے جب ان کی دولت عالمی سطح پر غیر معمولی توجہ کا مرکز بنی ہوئی ہے۔ فوربز کے مطابق حالیہ دنوں میں ایلون مسک دنیا کے پہلے شخص بنے تھے جن کی مجموعی دولت 800 ارب ڈالر سے تجاوز کر گئی، اگرچہ بعد میں اس میں کچھ کمی ضرور دیکھی گئی۔مسک کی اس پوسٹ کے بعد سوشل میڈیا صارفین کی جانب سے دلچسپ اور متضاد ردعمل سامنے آیا۔ کئی صارفین نے مزاحیہ انداز اختیار کرتے ہوئے کہا کہ اگر واقعی دولت خوشی نہیں خرید سکتی تو ایلون مسک انہیں 10 لاکھ ڈالر بھیج کر یہ بات عملی طور پر سمجھنے کا موقع دیں۔ ایک صارف نے طنزیہ تبصرہ کرتے ہوئے لکھا کہ فلسفیانہ باتیں اس وقت زیادہ آسان لگتی ہیں جب کرایہ، بل اور روزمرہ اخراجات پہلے ہی ادا ہو چکے ہوں۔
دوسری جانب کچھ صارفین نے مسک کے بیان سے اتفاق کرتے ہوئے کہا کہ اگرچہ دولت خوشی کی مکمل ضمانت نہیں، لیکن اس کی کمی انسان کی زندگی کو شدید مشکلات سے دوچار کر سکتی ہے۔ بعض افراد کا کہنا تھا کہ حقیقی خوشی دوسروں کی مدد کرنے اور معاشرے میں مثبت تبدیلی لانے سے ملتی ہے، اور ایلون مسک جیسے افراد کے پاس اربوں لوگوں کی زندگی بہتر بنانے کا سنہری موقع موجود ہے۔
ماہرین کے مطابق ایلون مسک کا یہ بیان ایک بار پھر اس قدیم سوال کو زندہ کرتا ہے کہ کیا دولت واقعی خوشی کی کنجی ہے یا نہیں۔ مسک کے الفاظ نے ثابت کیا ہے کہ بے پناہ دولت رکھنے کے باوجود انسانی اطمینان اور خوشی ایک الگ اور پیچیدہ معاملہ ہے۔