اردوورلڈ کینیڈا ( ویب نیوز )نگران وزیراعظم انورحق کاکڑ نے کہا ہے کہ اقتدار کی پرامن منتقلی ہماری اولین ترجیح ہے۔نگران وزیراعظم انوار الحق کاکڑ نے کراچی میں معروف کاروباری شخصیات سے خطاب کرتے ہوئے کہا کہ ملک کو بے روزگاری، مہنگائی اور خوراک کی کمی کا سامنا ہے، معاشی چیلنجز سے نمٹنے کی کوششوں میں تاجر برادری کا تعاون درکار ہے۔ .

نگراں وزیراعظم نے کہا کہ عوامی مسائل کا حل خدمت اور عبادت ہے، تاجر برادری ملک میں فنی تربیت کے فروغ کے لیے کردار ادا کرے، تاجروں کے مسائل حل کرنے کی پوری کوشش کریں گے، ہم ان کی بات سنیں گے۔
انہوں نے کہا کہ بلوچستان قیمتی معدنیات اور قدرتی وسائل سے مالا مال ہے، ہمارے پاس 6 ٹریلین ڈالر کے معدنی ذخائر ہیں، 25 کروڑ عوام مایوس ہیں، انسانی وسائل سے آنے والا زرمبادلہ ملکی ترقی میں کلیدی حیثیت رکھتا ہے۔
انہوں نے کہا کہ لوگ مایوس ہو کر کہتے ہیں کہ ملک چھوڑ کر جا رہے ہیں، ہم ہر چیز کو منفی انداز میں کیوں لے رہے ہیں۔

نگراں وزیراعظم کا مزید کہنا تھا کہ تاجروں کے مسائل کے حل کے لیے ہم ہر وقت حاضر ہیں، نعروں سے سوالوں کے جواب نہیں ملیں گے، سنجیدہ سوچ سے ہی جواب مل سکتے ہیں۔ قلیل اور طویل المدتی منصوبوں پر عمل درآمد کرنا ہوگا۔
انہوں نے کہا کہ ہمارا مینڈیٹ بہت محدود ہے، ہم نئی پارلیمنٹ کے وجود تک اپنی ذمہ داریاں نبھائیں گے، نگراں حکومت بین الاقوامی معاہدوں کی پاسداری اور شفاف انتخابات کے لیے اقدامات کر رہی ہے۔