اردو ورلڈ کینیڈا ( ویب نیوز)پیپلز پارٹی نے تمام سیاسی جماعتوں سے رابطے کا اعلان کردیا، بلاول بھٹو زرداری نے کہا کہ ملک کا معاشی اور سیاسی بحران ایسا ہے کہ سب کو کم از کم مشترکہ ایجنڈے پر اکٹھا ہونا چاہیے۔
چیئرمین پیپلز پارٹی بلاول بھٹو زرداری کا کہنا ہے کہ ہماری پارٹی ہمیشہ غیر آئینی اقدامات کے خلاف رہی ہے اور آئندہ بھی رہے گی۔
انہوں نے کہا کہ آج ہم جس دور سے گزر رہے ہیں وہ بھی ایک امتحان ہے، اگر ہم اس امتحان میں کامیاب ہوئے تو یہ ہماری کامیابی ہے، اگر ہم ناکام ہوئے تو ملک کو نقصان ہوگا۔
انہوں نے کہا کہ جو نقصان عمران خان کے دور میں ہو رہا تھا وہ اب نہیں ہو رہا، اس وقت ہمارا نظام اور آئین خطرے میں تھا، سیاسی مخالفین کو جیلوں میں ڈالا گیا، کوئی غیر جمہوری قدم اٹھایا گیا تو خاموش نہیں رہیں گے۔ . جہاں کہیں آئین کو خطرہ محسوس ہو گا اس کا مقابلہ کریں گے۔
وزیرخارجہ بلاول بھٹو زرداری نے کہا کہ ، آئین پر عملدرآمد کے لیے سب کو اپنا کردار ادا کرنا ہوگا، اپوزیشن کو بھی آئین کی بالادستی کے لیے اپنا جمہوری کردار ادا کرنا ہوگا۔
چیئرمین پیپلز پارٹی نے کہا کہ غیر ذمہ دار اپوزیشن نے انتہا پسندی کا کردار ادا کیا، یہی وجہ ہے کہ آج وہ اسمبلی کے رکن بھی نہیں۔
انہوں نے کہا کہ ملک جس بحران سے گزر رہا ہے اس طرح پہلے کبھی نہیں تھا، سیاسی جماعتوں کو کم از کم مشترکہ ایجنڈے پر اتفاق کرنا ہوگا، ایک بنیادی ضابطہ اخلاق کے لیے پیپلز پارٹی تمام سیاسی جماعتوں سے رابطہ کرے گی۔ ہم ان پارٹیوں سے بھی رابطہ کریں گے جو ہمیں پسند نہیں ہیں۔
ان کا مزید کہنا تھا کہ ہم فیصلہ کریں گے کہ پارلیمنٹ کے اندر اور باہر ایک دوسرے کے ساتھ کیسے کام کرنا ہے۔ کیونکہ ہمیں اکٹھا ہونا ہے، اگر ہم اکٹھے نہیں ہوئے تو حالات کو سنبھالنا مشکل ہے۔
