اردو ورلڈ کینیڈا ( ویب نیوز ) افغانستان کے مغربی شہر ہرات میں طالبان کی جانب سے ایک اور سخت کارروائی سامنے آئی ہے، جہاں ڈاڑھی منڈوانے کے الزام میں ایک شہری کو حراست میں لے لیا گیا ہے۔
مقامی ذرائع کے مطابق طالبان کے محکمہ امر بالمعروف و نہی عن المنکر کے اہلکاروں نے منگل کے روز امین اللہ عزیزی نامی شخص کو گرفتار کیا، جس کے بعد سے اس کے بارے میں کوئی مصدقہ معلومات سامنے نہیں آ سکیں۔ نہ تو اس کی رہائی کی خبر ہے اور نہ ہی یہ واضح کیا گیا ہے کہ اسے کہاں منتقل کیا گیا ہے۔افغان میڈیا کا کہنا ہے کہ ہرات میں اس سے قبل بھی کئی شہریوں کو ڈاڑھی منڈوانے پر طالبان کے سخت رویے کا سامنا کرنا پڑا ہے، جبکہ بعض افراد کو حراست میں بھی لیا گیا۔ تاہم اس حالیہ واقعے پر طالبان حکام کی جانب سے تاحال کوئی باضابطہ بیان جاری نہیں کیا گیا، جس کے باعث عوام میں تشویش پائی جا رہی ہے۔
واضح رہے کہ طالبان حکومت کی وزارتِ امر بالمعروف و نہی عن المنکر نے ایسے ضوابط نافذ کر رکھے ہیں جن کے تحت مردوں کو ڈاڑھی منڈوانے سے روکا گیا ہے اور خلاف ورزی کی صورت میں کارروائی کا عندیہ دیا گیا ہے۔ 2021 میں اقتدار میں واپسی کے بعد سے طالبان نے ملک بھر میں سخت سماجی اور مذہبی قوانین نافذ کیے ہیں، جن پر اقوام متحدہ اور بین الاقوامی انسانی حقوق کی تنظیمیں بارہا تشویش کا اظہار کر چکی ہیں۔
