ishtiaq ahmed 
اردوورلڈ کینیڈا( ویب نیوز)آل پاکستان پیٹرولیم ڈیلرز ایسوسی ایشن اور حکومت کے درمیان ٹیکسز کے معاملے پر مذاکرات ایک بار پھر ناکام ہوگئے اور ڈیڈ لاک برقرار، ایسوسی ایشن نے اسلام آباد کے علاوہ ملک بھر کے پمپس بند رکھنے کا اعلان کردیا۔
تفصیلات کے مطابق آل پاکستان پیٹرولیم ڈیلرز ایسوسی ایشن کی جانب سے ہڑتال کے معاملے پر پیٹرولیم ڈیلرز ایسوسی ایشن کے مطالبات پر ہونے والا اجلاس ختم ہوگیا جس میں ٹیکس کے معاملے پر حکومت اور پیٹرولیم ڈیلرز ایسوسی ایشن کے درمیان ڈیڈ لاک برقرار ہے۔
اجلاس کے بعد ایسوسی ایشن کے نمائندوں نے جمعہ سے ملک بھر میں پٹرول پمپس بند رکھنے کا اعلان کرتے ہوئے کہا کہ اسلام آباد میں ہڑتال نہیں ہو گی اور اس کے علاوہ ملک بھر کے تمام پمپس بند رہیں گے
انہوں نے کہا کہ اسلام آباد میں ایسوسی ایشن کے عہدیدار کی ہلاکت کے باعث ہڑتال کی کال واپس لے لی گئی ہے۔
رات 12 بجے ہی ایسوسی ایشن کی کال پر کراچی سمیت ملک کے دیگر علاقوں میں مالکان نے پٹرولیم مصنوعات کی سپلائی بند کر دی جس کے باعث شہریوں کو شدید مشکلات کا سامنا ہے۔
ادھر لاہور میں ایسوسی ایشن کے ایک دھڑے نے بھی ہڑتال کی مخالفت کرتے ہوئے کہا ہے کہ ایسے اقدامات سے کوئی حل نہیں نکل سکتا بلکہ مذاکرات کا راستہ اختیار کیا جائے گا۔
ادھر پیٹرولیم ڈویژن اور اوگرا نے اپنے مشترکہ بیان میں کہا ہے کہ ملک بھر میں پیٹرولیم مصنوعات دستیاب رہیں گی، تمام آئل مارکیٹنگ کمپنیاں پیٹرول پمپس پر پیٹرولیم مصنوعات کی وافر مقدار میں فراہمی کو یقینی بنائیں اور پیٹرول پمپ کھلے رکھیں۔
اوگرا کے ترجمان عمران غزنوی نے کہا کہ ملک میں پیٹرولیم مصنوعات کی وافر مقدار موجود ہے۔
واضح رہے کہ پاکستان پیٹرولیم ڈیلرز ایسوسی ایشن کی کال پر ایڈوانس ٹرن اوور ٹیکس کے خلاف احتجاج کے طور پر 5 جولائی سے ملک بھر کے 13 ہزار پیٹرول پمپس بند رکھنے کا اعلان کیا گیا تھا۔
پاکستان پیٹرولیم ڈیلرز ایسوسی ایشن کا کہنا ہے کہ یہ ہڑتال زیرو انڈیکسڈ 5 فیصد ایڈوانس ٹرن اوور ٹیکس کے نفاذ کے خلاف کی جارہی ہے جس کے لیے حکومت اور پیٹرولیم ڈیلرز کے درمیان ہونے والے مذاکرات ناکام ہوگئے۔
