اردو ورلڈ کینیڈا ( ویب نیوز ) لاکھوں عازمین حج کا مرکزی رکن ادا کرنے کے لیے میدان عرفات پہنچ گئے ہیں جہاں وہ ظہر اور عصر کی نماز قصر اور جمع کی صورت میں ادا کریں گے اور خطبہ حج سنیں گے۔ مسجد نمرہ میں خطبہ حج دیا جائے گا۔ مسجد الحرام کے امام و خطیب شیخ ماہر حمد المعقیلی خطبہ حج دیں گے، جسے اردو سمیت 50 زبانوں میں نشر کیا جائے گا۔عازمین پورا دن میدان عرفات میں عبادت میں گزاریں گے۔ عرفات میں خطبہ حج سننے کے بعد ظہر اور عصر کی نمازیں ایک ساتھ ادا کی جائیں گی۔ مغرب سے قبل عازمین مزدلفہ کے لیے روانہ ہوں گے اور وہاں مغرب اور عشاء کی نمازیں ایک ساتھ ادا کریں گے۔ مزدلفہ میں حجاج کرام رمی جمرات کے لیے کنکریاں جمع کریں گے۔

یہ بھی پڑھیں

مناسک حج کا پہلا مرحلہ شروع،عازمین منیٰ روانہ

اتوار کی صبح عازمین منیٰ واپس جائیں گے اور رمی جمرات ادا کریں گے جس کے بعد قربانی کی جائے گی اور عازمین حج کا فریضہ مکمل کریں گے۔عرب میڈیا کے مطابق عرفات میں مسجد نبوی کے بعد مکہ مکرمہ کے علاقے کی دوسری بڑی مسجد نمرہ میں عازمین کے استقبال کی تیاریاں کی گئی ہیں۔

بعض علاقوں میں درجہ حرارت 43 ڈگری سینٹی گریڈ تک بڑھ جانے کے باعث سعودی حکام نے تمام عازمین حج پر زور دیا ہے کہ وہ دھوپ اور گرمی سے خود کو بچانے کے لیے چھتری استعمال کریں اور وافر مقدار میں پانی پییں۔ سعودی وزارت صحت نے حجاج کرام کی فلاح و بہبود کو یقینی بنانے کے لیے 34 ہزار سے زائد ڈاکٹروں، نرسوں، فارماسسٹوں اور انتظامی عملے کو متحرک کیا ہے۔ ضرورت پڑنے پر زائرین کو طبی امداد فراہم کرنے کے لیے سات ایئر ایمبولینس اور 730 ایمبولینسیں بھی موجود ہیں۔