اردو ورلڈ کینیڈا ( ویب نیوز ) ماہرینِ فلکیات نے ناسا کے جیمز ویب اسپیس ٹیلی اسکوپ کی مدد سے ایک انوکھا سیارہ دریافت کیا ہے
جس کی شکل لیموں جیسی ہے۔ سائنس دانوں کے مطابق یہ سیارہ نہ صرف اپنی غیر معمولی شکل کی وجہ سے منفرد ہے بلکہ یہ ستاروں اور سیاروں کے درمیان فرق کو دھندلا کر سکتا ہے۔اس سیارے کا نام PSR J2322-2650b رکھا گیا ہے اور یہ یونیورسٹی آف شیکاگو کے سائنس دانوں کی تحقیق میں سامنے آیا ہے، جو رواں ہفتے ’دی آسٹروفزیکل جرنل لیٹرز‘ میں شائع ہوئی۔ یہ سیارہ اپنے مرکزی ستارے سے تقریباً 10 لاکھ میل کے فاصلے پر گردش کرتا ہے، جو زمین اور سورج کے فاصلے سے تقریباً 100 گنا کم ہے۔ اس سیارے کا ایک سال صرف 7.8 گھنٹے پر مشتمل ہے، یعنی یہ انتہائی تیز رفتار سے اپنے ستارے کے گرد گھومتا ہے۔لیموں نما سیارے کا مرکزی ستارہ ایک پلسر ہے، جو تیزی سے گھومنے والا نیوٹرون ستارہ ہے۔ پلسر کی شدید کششِ ثقل کی وجہ سے یہ سیارہ بیضوی یا لیموں نما شکل اختیار کر گیا ہے۔ ماہرین کے مطابق اس سیارے کے ماحول میں ہیلیئم اور کاربن کی بڑی مقدار موجود ہے اور یہاں بہت تیز ہوائیں چل رہی ہیں، جو اس کی حیرت انگیز نوعیت کو اور بھی بڑھا دیتی ہیں۔یہ دریافت فلکیات کے میدان میں ایک نیا انوکھا قدم ہے، کیونکہ اس طرح کے سیارے ستاروں اور دیگر سیاروں کے درمیان فرق کو سمجھنے میں مددگار ثابت ہو سکتے ہیں اور کائنات کی ساخت کے بارے میں نئے سوالات کو جنم دیتے ہیں۔
