اردو ورلڈ کینیڈا ( ویب نیوز ) پاکستان سپر لیگ کے 11 ویں ایڈیشن میں پلیئرز آکشن متعارف کرانے کا فیصلہ کر لیا گیا ہے۔
ذرائع کے مطابق پی ایس ایل گورننگ کونسل کی ورکنگ کمیٹی کے رات گئے اجلاس میں کھلاڑیوں کی ری ٹینشن اور آکشن ڈرافٹ کے حوالے سے اہم فیصلے کیے گئے ہیں۔ذرائع نے بتایا کہ پی ایس ایل کے 11 ویں ایڈیشن کے لیے کھلاڑیوں کی ری ٹینشن کے معاملات بھی طے پا گئے ہیں۔ لاہور قلندرز، کوئٹہ گلیڈی ایٹرز، اسلام آباد یونائیٹڈ، کراچی کنگز اور حیدر آباد نے آکشن کے حق میں ووٹ دیا۔ذرائع کے مطابق پرانی پانچ فرنچائزز نے ہر کیٹیگری میں چار کھلاڑیوں کی ری ٹینشن پر اتفاق کیا ہے۔ ان میں سے ایک کھلاڑی کو نچلی کیٹیگری میں لا کر برانڈ ایمبیسڈر بنایا جا سکے گا۔ نئی فرنچائزز باقی پلیئرز پول سے کھلاڑیوں کا انتخاب کریں گی جبکہ باقی کھلاڑیوں کا انتخاب آکشن کے ذریعے ہوگا۔
ورکنگ کمیٹی نے فیصلہ کیا کہ دو نئی فرنچائزز نے زیرو ری ٹینشن پر زور دیا ہے۔ ذرائع نے بتایا کہ پی ایس ایل کے آکشن اور ری ٹینشن کے فارمولا کی حتمی منظوری چیئرمین پی سی بی محسن نقوی دیں گے، اور ضرورت پڑنے پر گورننگ کونسل کا اجلاس بھی طلب کیا جا سکتا ہے۔ذرائع کے مطابق فارمولا چیئرمین محسن نقوی کو بھجوایا جا چکا ہے اور آئندہ ایک سے دو روز میں اس کا باقاعدہ اعلان کر دیا جائے گا۔ اس سلسلے میں پی ایس ایل کھلاڑیوں کے معاوضے میں اضافے کا مشورہ بھی دیا گیا ہے تاکہ لیگ میں کھیلنے والے کھلاڑیوں کو بہتر مراعات فراہم کی جا سکیں۔
