اردو ورلڈ کینیڈا ( ویب نیوز ) پاسداران انقلاب کے ترجمان بریگیڈیئر جنرل علی محمد کا کہنا ہے کہ دشمن کو ہمارے درست جواب کا انتظار کرنا پڑے گا۔انہوں نے کہا کہ ایران کا ردعمل ماضی کے اقدامات جیسا نہیں ہوسکتا، وقت ہمارے ساتھ ہے، اسرائیل کے خلاف ردعمل طویل ہوسکتا ہے۔جنرل علی محمد نے کہا کہ اسماعیل ہنیہ کی شہادت میں صیہونی حکومت نے مخصوص اہداف مقرر کیے تھے لیکن وہ کچھ حاصل نہیں کرسکے، بلکہ مزاحمتی محاذ مضبوط ہوتا گیا۔
انہوں نے مزید کہا کہ غزہ جنگ بندی کی حمایت کرتے ہیں لیکن کسی بھی سیاسی پیش رفت کا اسرائیل کے خلاف جوابی کارروائی کے ہمارے حق سے کوئی تعلق نہیں ہے۔اس سے قبل اگست کے دوسرے ہفتے میں امریکی اور برطانوی میڈیا نے دعویٰ کیا تھا کہ اسماعیل ہنیہ کے قتل کا بدلہ لینے کے لیے ایران جلد ہی اسرائیل پر حملہ کر سکتا ہے۔امریکی قومی سلامتی کونسل کے ترجمان جان کربی نے وائٹ ہاؤس میں صحافیوں سے بات کرتے ہوئے کہا کہ ہمیں اسرائیل پر بڑے حملے کے لیے تیار رہنا ہوگا۔
