اردوورلڈکینیڈا( ویب نیوز)البرٹا کی سیاست میں بے چینی مزید بڑھ گئی ہے، جہاں صوبائی اسمبلی کے مزید تین اراکین کے خلاف شہریوں کی جانب سے ری کال (عہدے سے ہٹانے) کی درخواستوں کی منظوری دے دی گئی ہے۔ الیکشنز البرٹا نے یونائیٹڈ کنزرویٹو پارٹی (UCP) کے دو بیک بینچر اراکین جسٹن رائٹ اور رون ویب، جبکہ اپوزیشن نیو ڈیموکریٹک پارٹی (NDP) کی رکن پیگی رائٹ کے خلاف دائر درخواستوں کو باضابطہ طور پر منظور کر لیا ہے۔
ان تازہ منظوریوں کے بعد صوبے میں مجموعی طور پر 26 اراکینِ اسمبلی اس وقت ری کال کی زد میں آ چکے ہیں، جن میں 24 حکمران جماعت یو سی پی اور دو اپوزیشن این ڈی پی سے تعلق رکھتے ہیں۔ اس طرح وزیر اعلیٰ ڈینیئل اسمتھ کی کابینہ اور پارلیمانی ٹیم کا نصف سے زیادہ حصہ اب عوامی دباؤ کا سامنا کر رہا ہے۔
یو سی پی کے جن نمایاں اراکین کے خلاف پہلے ہی ری کال کی درخواستیں زیرِ عمل ہیں، ان میں ڈیمیٹریوس نکولائیڈز، رک مک آئیور، راجن ساونی، ایڈریانا لاگرانج، مکی ایمری اور خود وزیر اعلیٰ ڈینیئل اسمتھ بھی شامل ہیں۔ اپوزیشن کی جانب سے لیبر کریٹک پیگی رائٹ اور ایجوکیشن کریٹک امانڈا چیپ مین بھی ان دو این ڈی پی اراکین میں شامل ہیں جن کے خلاف درخواستیں منظور ہو چکی ہیں۔
سائپرس-میڈیسن ہیٹ سے منتخب جسٹن رائٹ کے خلاف درخواست گزار ہولی ٹرنبل کا مؤقف ہے کہ رکنِ اسمبلی نے مشرقی پہاڑی علاقوں میں کوئلے کی کان کنی کے منصوبوں پر خاموشی اختیار کیے رکھی، حالانکہ ان منصوبوں سے پانی اور زراعت کو سنگین خطرات لاحق ہو سکتے ہیں۔ اس کے علاوہ، درخواست میں اس بات پر بھی اعتراض اٹھایا گیا ہے کہ جسٹن رائٹ نے اساتذہ کی ہڑتال ختم کرانے کے لیے نان وِد اسٹینڈنگ کلاز کے استعمال کی حمایت کی۔
یہ بھی پڑھیں :پریمیئرڈینیئل سمتھ کوہٹانے کے لیے عوام نے دستخطی مہم شروع کر دی
جسٹن رائٹ نے الیکشنز البرٹا کو دیے گئے بیان میں ان الزامات کو مسترد کرتے ہوئے کہا کہ وہ صحت کے شعبے میں بہتری کے لیے وزرا کے ساتھ ملاقاتیں کرتے رہے ہیں اور مختلف فورمز پر عوامی مسائل اجاگر کرتے رہے ہیں۔
اسی طرح گرانڈ پریری-واپیٹی سے تعلق رکھنے والے رون ویب کے خلاف بھی نان وِد اسٹینڈنگ کلاز کے استعمال کو بنیادی وجہ بنایا گیا ہے۔ درخواست گزار ڈیبورا ہیرس کے مطابق ایک رکنِ اسمبلی کی بنیادی ذمہ داری عوام کے حقوق کا تحفظ ہے، نہ کہ انہیں محدود کرنا۔
ادھر ایڈمنٹن-بیورلی-کلئرویُو سے این ڈی پی کی رکن پیگی رائٹ کے خلاف درخواست میں الزام لگایا گیا ہے کہ وہ اکثر حلقے کے عوام کے لیے ناقابلِ رسائی رہتی ہیں اور عوامی رابطوں کا جواب نہیں دیتیں۔ درخواست میں اسکولوں میں جنسی مواد سے متعلق کتابوں کے معاملے پر بھی ان کے مؤقف کو تنقید کا نشانہ بنایا گیا ہے۔
پیگی رائٹ نے اپنے جواب میں کہا کہ بطور سابقہ استاد وہ تعلیمی نظام کی ضروریات سے بخوبی آگاہ ہیں اور مہنگائی، صحت، تعلیم اور بنیادی سہولیات جیسے مسائل پر عوام کی نمائندگی جاری رکھیں گی۔
قانون کے مطابق درخواست گزاروں کو تین ماہ کے اندر اپنے حلقے میں 2023 کے صوبائی انتخابات میں ڈالے گئے کل ووٹوں کے 60 فیصد کے برابر دستخط جمع کروانا ہوں گے۔ اگر درخواست کامیاب ہو جاتی ہے تو متعلقہ حلقے میں ریفرنڈم کرایا جائے گا، اور ناکامی کی صورت میں ضمنی انتخاب منعقد کیا جائے گا۔
