اردوورلڈ کینیڈا (ویب نیوز)این اے 45 کرم ضمنی انتخاب میں پولنگ جاری ہے جہاں پی ٹی آئی چیئرمین عمران خان امیدواروں میں شامل ہیں۔
پولنگ صبح 8 بجے شروع ہوئی جو شام 5 بجے تک بغیر کسی وقفے کے جاری رہے گی۔
پی ٹی آئی کے سربراہ عمران خان ، جمعیت علمائے اسلام (ف) کے جمیل خان اور جماعت اسلامی (جے آئی) کے شیر محمد خان سمیت 16 امیدوار انتخابات میں حصہ لے رہے ہیں۔
عمران خان اور پی ڈی ایم کے امیدوار جمیل خان کے درمیان سخت مقابلہ متوقع ہے ۔
اس سے قبل الیکشن کمیشن آف پاکستان نے ضمنی انتخابات کے لیے انتظامات مکمل کرنے کا اعلان کیا تھا۔
الیکشن کمیشن خیبرپختونخوا کے ترجمان کے مطابق اس حلقے میں 198,618 رجسٹرڈ ووٹرز – 111,349 مرد اور 87,269 خواتین – ہیں۔
ترجمان کے مطابق ووٹرز 143 پولنگ اسٹیشنز پر اپنا ووٹ ڈالیں گے جن میں سے 119 کو انتہائی حساس اور 24 کو حساس قرار دیا گیا ہے۔
ڈسٹرکٹ پولیس آفیسر (ڈی پی او) کرم ارباب شفیع اللہ نے بتایا کہ این اے 45 میں ضمنی انتخابات کے لیے سیکیورٹی کے انتظامات مکمل کر لیے گئے ہیں اور انتخابی سامان کی نقل و حمل شروع کر دی گئی ہے۔
انہوں نے کہا کہ پولنگ ڈیوٹی پر 2100 پولیس اہلکار تعینات کیے گئے ہیں۔
ڈی پی او نے سیاسی رہنماؤں اور کارکنوں سے کہا ہے کہ وہ آج الیکشن کے دوران امن برقرار رکھنے کے لیے قواعد کی پابندی کریں اور پولیس کے ساتھ تعاون کریں۔
صوبائی الیکشن کمشنر شمشاد خان نے کمشنر کوہاٹ ڈویژن کو ہدایت کی ہے کہ این اے 45 کرم کے ضمنی انتخاب کے لیے سکیورٹی کے فول پروف انتظامات کیے جائیں تاکہ ووٹرز بلا خوف و خطر اپنا ووٹ کاسٹ کر سکیں۔
