اردو ورلڈ کینیڈا ( ویب نیوز ) چیمپئنز ٹرافی میں ناقص کارکردگی کے باعث ڈراپ کے خوف سے پاکستان کرکٹ ٹیم کے سینئر کھلاڑیوں نے اگلی سیریز سے وقفہ لینے کے لیے مشاورت شروع کردی ہے۔
قومی کھلاڑیوں کی ناقص کارکردگی پرپاکستان کرکٹ بورڈ کے اعلیٰ حکام سخت نالاں ہیں۔ذرائع کے مطابق پاکستان کرکٹ ٹیم کے سینئر کھلاڑیوں نے نیوزی لینڈ کے خلاف سیریز کے لیے ’بریک‘ لینے کے لیے مشاورت شروع کردی ہے، کچھ کھلاڑی دورہ نیوزی لینڈ سے دستبردار ہوسکتے ہیں۔ذرائع کا کہنا ہے کہ پاکستان کرکٹ ٹیم کی اگلی اسائنمنٹ نیوزی لینڈ میں وائٹ بال سیریز ہے۔ پاکستانی ٹیم کو نیوزی لینڈ میں 5 ٹی ٹوئنٹی اور تین ون ڈے میچز کھیلنے ہیں۔ سیریز 16 مارچ سے 5 اپریل تک کھیلی جائے گی۔ذرائع کا کہنا ہے کہ چیمپئنز ٹرافی میں خراب کارکردگی کی بنیاد پر کچھ کھلاڑیوں کو ڈراپ کیے جانے کا خدشہ ہے۔
ان کی ناقص کارکردگی کی وجہ سے بورڈ کے اعلیٰ حکام کھلاڑیوں سے کافی نالاں ہیں اور کھلاڑی ڈراپ ہونے سے پہلے ہی دستبردار ہونے کی منصوبہ بندی کر رہے ہیں۔ذرائع کے مطابق نیوزی لینڈ کے خلاف سیریز کے لیے شاہین شاہ آفریدی، حارث رؤف، نسیم شاہ اور بابر اعظم کو قومی ٹیم سے ڈراپ کرنے کی افواہیں ہیں۔واضح رہے کہ چیمپئنز ٹرافی کے پہلے میچ میں پاکستان کو نیوزی لینڈ کے ہاتھوں 60 رنز سے شکست ہوئی تھی جب کہ دوسرے میچ میں بھارت نے پاکستان کو 6 وکٹوں سے شکست دی تھی۔ تیسرا میچ بارش کے باعث منسوخ کر دیا گیا۔
