اردو ورلڈ کینیڈا ( ویب نیوز)وزیراعظم شہباز شریف نے ٹیکس ریونیو بڑھانے کے لیے جامع حکمت عملی تیار کرنے کی بھی ہدایت کی۔
وزیراعظم شہباز شریف نے سگریٹ انڈسٹری میں ٹیکس چوری کی روک تھام کے لیے فوری اقدامات کرنے اور آئندہ دو ہفتوں میں ملک کی تمام سگریٹ فیکٹریوں میں ٹریک اینڈ ٹریس سسٹم کی تنصیب کو یقینی بنانے کی ہدایت کی ہے۔

اجلاس میں وزیراعظم نے قانون نافذ کرنے والے اداروں کو ہدایت کی کہ غیر قانونی سگریٹ کی سمگلنگ اور فروخت کی روک تھام کے لیے ایف بی آر کو ہر قسم کا تعاون فراہم کیا جائے۔
انہوں نے ملک کے تمام بڑے سیکٹرز میں آٹومیٹک ٹریک اینڈ ٹریس سسٹم کی تنصیب کو یقینی بنانے اور ٹیکس ریونیو بڑھانے کے لیے جامع حکمت عملی تیار کرنے کی بھی ہدایت کی۔
وزیراعظم نے حکم دیا کہ بارڈر کراسنگ پر اچھی شہرت کے حامل افسران کی تعیناتی کی جائے۔ انہوں نے شوگر ملوں پر آٹومیٹک ٹریک اینڈ ٹریس سسٹم نہ لگانے کے ذمہ داروں کا تعین کرکے انکوائری رپورٹ پیش کرنے کی ہدایت کی اور حکم دیا کہ ٹیکس چوری کرنے والے عناصر اور ان کے کارندوں کو کیفرکردار تک پہنچایا جائے۔