اردو ورلڈ کینیڈا ( ویب نیوز ) وزیر اعظم شہباز شریف ہولناک زلزلے کے بعد ترک عوام سے اظہار ہمدردی کے لیے بدھ کو ترکی جائیں گے۔وزیر اعظم شہباز شریف وزیر خارجہ بلاول بھٹو زرداری کے ہمراہ ہوں گے۔

دونوں زلزلے سے متاثرہ علاقوں کا دورہ کریں گے۔سفارتی ذرائع کے مطابق وزیراعظم شہباز شریف اپنے دورے کے دوران انقرہ بھی جائیں گے جہاں وہ ترک صدر رجب طیب اردوان سے ملاقات کریں گے۔

دوسری جانب دفتر خارجہ سے جاری بیان میں کہا گیا ہے کہ ترکی میں شدید زلزلے کے نتیجے میں قیمتی جانوں اور املاک کے ضیاع پر حکومت اور پاکستانی عوام کو شدید تشویش ہے۔
بیان میں کہا گیا ہے کہ پاکستانی عوام دکھ کی اس مشکل گھڑی میں اپنے ترک بھائیوں کے ساتھ مکمل یکجہتی کے ساتھ کھڑے ہیں اور زخمیوں کی جلد صحت یابی کے لیے دعاگو ہیں۔

ترجمان دفتر خارجہ نے مزید کہا کہ پاکستان امدادی سرگرمیوں میں ہر ممکن تعاون کے لیے تیار ہے، ہم امید کرتے ہیں کہ ترک قوم اس قدرتی آفت پر ہمت اور عزم سے قابو پالے گی۔