اردو ورلڈ کینیڈا ( ویب نیوز ) وزیر اعظم شہباز شریف امیر قطر شیخ تمیم بن حمد الثانی کی دعوت پر قطر کے دو روزہ سرکاری دورے پر دوحہ روانہ ہو گئے۔
عہدہ سنبھالنے کے بعد وزیراعظم کا قطر کا یہ پہلا دورہ ہے۔
وزیراعظم کے ہمراہ کابینہ کے اہم ارکان سمیت اعلی سطح کا وفد بھی ہے۔
دورے کے دوران شہباز شریف قطری قیادت سے تفصیلی مشاورت کریں گے۔ دونوں فریقین توانائی سے متعلق تعاون کو آگے بڑھانے، تجارتی اور سرمایہ کاری کے تعلقات کو گہرا کرنے اور قطر میں پاکستانیوں کے لیے روزگار کے وسیع مواقع تلاش کرنے پر خصوصی توجہ کے ساتھ دوطرفہ تعلقات کے تمام پہلوں کا جائزہ لیں گے۔
وہ باہمی دلچسپی کے متعدد علاقائی اور بین الاقوامی امور پر بھی تبادلہ خیال کریں گے۔
وزیراعظم قطری اور پاکستانی تاجروں، سرمایہ کاروں اور کاروباری شخصیات سے بھی ملاقاتیں کریں گے۔
وہ دوحہ کے اسٹیڈیم 974 کا دورہ کریں گے جہاں انہیں فیفا ورلڈ کپ کی میزبانی کے لیے قطری حکومت کی جانب سے کی گئی وسیع تیاریوں کے بارے میں بریفنگ دی جائے گی۔
قبل ازیں وزیراعظم شہباز شریف نے کہا کہ پاکستان قطر کے ساتھ اپنے تاریخی دوطرفہ تعلقات کو مزید مضبوط اسٹریٹجک تعلقات میں تبدیل کرنا چاہتا ہے۔
دوحہ کے سرکاری دورے پر جانے سے قبل منگل کو اپنے ٹویٹس میں، انہوں نے کہا کہ یہ دورہ دونوں ممالک کے درمیان بھائی چارے اور دوستی کے بندھن کی تجدید کرے گا۔
