اردوورلڈکینیڈا( ویب نیوز)وزیراعظم محمد شہباز شریف سے بدھ کو بنگلا دیش کے مشیر برائے مذہبی امور، ڈاکٹر اے ایف ایم خالد حسین نے ملاقات کی، جس میں دونوں ممالک کے درمیان براہ راست فضائی رابطے کی بحالی سمیت دوطرفہ تعلقات پر تبادلہ خیال کیا گیا۔ ملاقات میں پاکستان میں بنگلا دیش کے ہائی کمشنر محمد اقبال حسین خان بھی موجود تھے۔
وزیراعظم نے اپنے خطاب میں ڈاکٹر حسین اور ان کے وفد کا خیرمقدم کرتے ہوئے کہا کہ پاکستان اور بنگلا دیش کے تعلقات مشترکہ تاریخ، ثقافتی روابط اور گہری وابستگیوں پر مبنی ہیں۔ انہوں نے کہا کہ عوامی تعلقات، علمی اور تعلیمی تبادلے، تجارتی و اقتصادی تعلقات سمیت دیگر شعبوں میں دوطرفہ روابط مثبت سمت میں جا رہے ہیں اور ان تعلقات کو مزید فروغ دینے کی ضرورت ہے۔
وزیراعظم نے نیویارک اور قاہرہ میں ہونے والی ملاقاتوں کا حوالہ دیتے ہوئے چیف ایڈوائزر پروفیسر محمد یونس کی قیادت اور غربت کے خاتمے میں ان کے کردار کو سراہا، اور پاکستان و بنگلا دیش کے تعلقات کو مضبوط بنانے کی خواہش کا اعادہ کیا۔
ڈاکٹر خالد حسین نے وزیراعظم کا شکریہ ادا کرتے ہوئے کہا کہ پاکستان اور بنگلا دیش کے تعلقات تاریخی روابط اور مشترکہ عقیدے پر مبنی ہیں۔ اس موقع پر انہوں نے چیف ایڈوائزر پروفیسر محمد یونس کا ایک خط بھی وزیراعظم کے حوالے کیا، جس میں پاکستان میں سیلاب کے باعث ہونے والے جانی و مالی نقصان پر تعزیت اور امداد کی پیشکش کی گئی تھی۔
ملاقات کے دوران دونوں فریقین نے براہ راست پروازوں کی بحالی کے امکانات پر بھی بات کی۔ وزیراعظم نے توقع ظاہر کی کہ اعلیٰ سطح کے دوروں کا تبادلہ جاری رہے گا تاکہ دوطرفہ تعلقات کی موجودہ مثبت رفتار برقرار رہے۔ اس سلسلے میں وزیراعظم نے چیف ایڈوائزر کو پاکستان کا سرکاری دورہ کرنے کی دعوت بھی دی، جس پر بنگلا دیشی مشیر نے حکومت کی جانب سے دورے کی دعوت قبول کی۔
