اردوورلڈ کینیڈا( ویب نیوز)وزیراعظم شہباز شریف کی زیر صدارت ایپکس کمیٹی کا اجلاس ہوا، جس میں معاشی بحالی اور سرمایہ کاری سے متعلق اقدامات پر اطمینان کا اظہار کیا گیا۔
ملاقات میں وزیراعظم نے کونسل کو غیر ملکی سرمایہ کاری سے متعلق مواقع تلاش کرنے کی بھی ہدایت کی، کونسل اور صوبائی حکومت کو مکمل تعاون کی یقین دہانی کرائی گئی، غیر ملکی دوروں اور ملاقاتوں پر بھی شرکاء کو اعتماد میں لیا گیا، وزیراعظم نے معیشت کی بہتری کے لیے آرمی چیف کے کردار کو سراہا۔
اس موقع پر گفتگو کرتے ہوئے وزیراعظم شہباز شریف نے کہا کہ اتحادی حکومت کو تباہ حال معیشت ورثے میں ملی، مشکل اور دلیرانہ فیصلے ملک کو تعمیر و ترقی کی طرف لے جارہے ہیں۔ براہ راست غیر ملکی سرمایہ کاری کلیدی حیثیت رکھتی ہے جس کے موثر نفاذ کے لیے وفاق اور صوبوں میں شراکت داری کا طریقہ اپنایا جائے گا۔
وزیراعظم شہباز شریف نے مزید کہا ہے کہ سرمایہ کار اولین ترجیح ہیں، تعاون کے ذریعے منصوبوں کی منظوری کا عمل تیز کیا جائے، ہمیں اپنی پوری صلاحیتوں کے ساتھ مل کر کام کرنا ہے، ہم پاکستان اور عوام کی تقدیر بدل سکتے ہیں . ہم نے ملک و قوم کو ترقی اور خوشحالی کی راہ پر گامزن رکھنا ہے
انہوں نے کہا ہے کہ غیر ملکی سرمایہ کاری سے روزگار کے نئے مواقع پیدا ہوں گے، نوجوانوں اور خواتین کو روزگار ملے گا، ترقی کی نئی راہیں کھلیں گی، ہماری توجہ نوجوانوں اور خواتین کو ان کی بہترین صلاحیتوں سے بااختیار بنانا ہے۔
