اردوورلڈکینیڈا(ویب نیوز)برٹش کولمبیا کے شہر کیلونا کے ہوائی اڈے نے تصدیق کی ہے کہ اس کے انفارمیشن اسکرینز اور پبلک ایڈریس سسٹم کو ہیک کر لیا گیا، جس کے نتیجے میں کچھ پروازیں تاخیر کا شکار ہوئیں۔ سوشل میڈیا پر سامنے آنے والی پوسٹس میں پرو-حماس پیغامات ان اسکرینوں پر دکھائی دیے۔

آن لائن گردش کرنے والی تصاویر میں کیلونا انٹرنیشنل ایئرپورٹ (YLW) کی اسکرینوں پر یہ پیغام درج تھااسرائیل جنگ ہار گیا، حماس جیت گیا”
اور امریکی صدر ڈونلڈ ٹرمپ کے خلاف توہین آمیز الفاظ لکھے گئے تھےٹرانسپورٹ کینیڈا کے مطابق، اسی نوعیت کے واقعات تقریباً اسی وقت اونٹاریو کے ونسڈزر انٹرنیشنل ایئرپورٹ اور برٹش کولمبیا کے وِکٹوریا انٹرنیشنل ایئرپورٹ پر بھی پیش آئے۔

دیگر ویڈیوز میں یہ بھی دکھایا گیا کہ کیلونا ایئرپورٹ کے اعلاناتی نظام (PA system) پر بھی نعرے نشر کیے گئے، اور اسی طرح کا واقعہ امریکی ریاست پنسلوانیا کے ہیریسبرگ انٹرنیشنل ایئرپورٹ میں بھی پیش آیا۔

کیلونا ایئرپورٹ نے اپنی ویب سائٹ پر جاری بیان میں کہا کہ عملے نے “تھرڈ پارٹی” کی جانب سے نشر کیے گئے غیر مجاز پیغامات کو کامیابی سے ہٹا دیا۔

منگل کی رات 10 بجے جاری تازہ بیان میں کہا گیا کہ ایئرپورٹ اپنی اسکرین اور اعلان کے نظام کو بحال کرنے پر کام کر رہا تھا، اور اسی دوران کچھ پروازوں میں تاخیر ہوئی۔

اگلی صبح ایئرپورٹ کے روانگی کے شیڈول میں تین پروازیں تاخیر کا شکار دکھائی گئیں، البتہ یہ واضح نہیں کیا گیا کہ آیا یہ تاخیر سائبر حملے سے متعلق تھی یا نہیں۔

خود کو “Siberislam” کہلانے والے ایک گروپ نے ان ہیکنگ واقعات کی ذمہ داری قبول کی اور اپنی سوشل میڈیا پوسٹس میں ان ویڈیوز کو شیئر کیا۔

کیلونا ایئرپورٹ کے مطابق، یہ سائبر سیکیورٹی حملہ صرف ایک کلاؤڈ بیسڈ تھرڈ پارٹی سافٹ ویئر تک محدود تھا، جبکہ دیگر نظام سیکیورٹی وجوہات کی بنا پر علیحدہ رکھے گئے ہیں۔بیان میں کہا گیا،تمام متاثرہ نظاموں کو علیحدہ کر کے جانچ لیا گیا اور منگل کی رات دیر گئے بحال کر دیا گیا۔”

ٹرانسپورٹ کینیڈا نے کہا ہے کہ وہ وفاقی سیکیورٹی اداروں کے ساتھ مل کر اس واقعے کی تحقیقات کر رہا ہے تاکہ آئندہ اس طرح کے حملوں کو روکا جا سکے اور ہوائی اڈوں کی سیکیورٹی یقینی بنائی جا سکے۔وِکٹوریا انٹرنیشنل ایئرپورٹ نے مسافروں سے ہونے والی کسی بھی تکلیف پر معذرت کی ہے۔