اردوورلڈکینیڈا(ویب نیوز)کیلگری میں شہر کے سب سے متنازعہ قوانین میں سے ایک یعنی بلینکٹ ری زوننگ کو ختم کرنے کی تیاریاں تیز ہو گئی ہیں۔ اس حوالے سے ایک اہم قرارداد سترہ نومبر کو ایگزیکٹو کمیٹی میں پیش کی جائے گی اور اگر یہ منظور ہو جاتی ہے تو اسے پندرہ دسمبر کے معمول کے سٹی کونسل اجلاس میں ووٹنگ کے لیے بھیج دیا جائے گا۔
میئر جیرومی فارکاس اور کونسلرز آندرے چیبو، ڈین مک لین، کم ٹائرز، رب وارڈ، مائیک جیمیسن اور لینڈن جوناسٹن اس قرارداد کی حمایت کر رہے ہیں۔ ان کا مؤقف ہے کہ بلینکٹ ری زوننگ نے نہ تو رہائش کی بڑھتی ہوئی قیمتوں میں کوئی کمی لائی اور نہ ہی شہریوں کے مسائل کو کم کیا بلکہ اس سے مختلف خدشات میں اضافہ ہوا ہے۔ شہریوں کا کہنا ہے کہ اس پالیسی سے محلوں کی شناخت متاثر ہوئی، پرانے انفراسٹرکچر پر غیر ضروری دباؤ بڑھا، پارکنگ اور ٹریفک مسائل میں اضافہ ہوا اور درختوں کے کم ہونے کا خطرہ پیدا ہوا۔
قرارداد میں کہا گیا ہے کہ اس پالیسی نے ہزاروں لوگوں کو اپنی کمیونٹی کی ترقی کے فیصلوں میں رائے دینے کے حق سے محروم کر دیا، کیونکہ کم کثافت والے رہائشی علاقوں میں مخصوص زمین کے استعمال کے لیے عوامی سماعتوں کا عمل ختم کر دیا گیا تھا۔ یہی وجہ ہے کہ شہر کے مختلف علاقوں میں اس کے خلاف مخالفت اور احتجاج دیکھنے میں آیا۔ بلینکٹ ری زوننگ چھ اگست دو ہزار چوبیس کو نافذ ہوئی تھی جبکہ اس سے قبل دو ہفتوں سے زیادہ جاری رہنے والی ایک طویل عوامی سماعت میں تقریباً ستر فیصد شہریوں نے اس کی مخالفت کی تھی۔
اگر یہ قانون واپس لیا جاتا ہے تو شہر میں وہی کم کثافت والے لینڈ یوز زون دوبارہ بحال ہو جائیں گے جو پہلے موجود تھے۔ فارکاس اور ان کے ساتھی شہریوں کے اس حق کی بھی تجدید کر رہے ہیں کہ وہ سٹی کونسل کی عوامی سماعتوں میں براہ راست حصہ لے سکیں۔ دلچسپ بات یہ ہے کہ اس قرارداد کے تقریباً تمام حامی نمائندے حال ہی میں منتخب ہوئے ہیں اور ان کی انتخابی مہم میں بلینکٹ ری زوننگ کو ختم کرنا مرکزی نکتہ تھا۔
