اردو ورلڈ کینیڈا ( ویب نیوز )پاکستان تحریک انصاف (پی ٹی آئی) کے چیئرمین عمران خان نے وفاقی تحقیقاتی ایجنسی (ایف آئی اے) کی جانب سے ممنوعہ فنڈنگ سے متعلق کیس میں مقدمہ درج کرنے کے ایک دن بعد حفاظتی ضمانت کے لیے اسلام آباد ہائی کورٹ (آئی ایچ سی) سے رجوع کر لیا۔
سابق وزیراعظم عمران خان نے اپنی درخواست میں موقف اختیار کیا ہے کہ ایف آئی اے نے ان کے خلاف بوگس مقدمہ درج کیا اور عدالت سے درخواست کی کہ انہیں حفاظتی ضمانت دی جائے تاکہ وہ متعلقہ عدالت میں پیش ہوسکیں۔
دوسری جانب رجسٹرار آئی ایچ سی نے درخواست پر اعتراضات اٹھاتے ہوئے کہا ہے کہ پی ٹی آئی نے بائیو میٹرک نہیں کروائی اور وہ خصوصی عدالت سے رجوع کرنے سے پہلے کیسے آئی ایچ سی سے رجوع کر سکتے ہیں۔
تاہم بعد ازاں اسلام آباد ہائی کورٹ کے چیف جسٹس اطہر من اللہ نے درخواست پر سماعت کی اور اسلام آباد انتظامیہ کو مدعی کو گرفتار نہ کرنے کا حکم دیتے ہوئے عدالت میں پیش ہونے کا حکم دیا۔
قابل ذکر ہے کہ وفاقی تحقیقاتی ایجنسی (ایف آئی اے) کے کارپوریٹ بینکنگ سرکل نے منگل کو ممنوعہ فنڈنگ کیس میں سابق وزیراعظم سمیت 11 افراد کے خلاف مقدمہ درج کرایا۔
فرسٹ انفارمیشن رپورٹ (ایف آئی آر) کے مطابق ایف آئی آر میں نامزد ملزمان نے فارن ایکسچینج ایکٹ کی خلاف ورزی کی ہے۔ ایف آئی آر میں سردار اظہر طارق، سیف اللہ نیازی، سید یونس، عامر کیانی، طارق شیخ اور طارق شفیع کو نامزد کیا گیا ہے۔
ایف آئی آر میں کہا گیا کہ ملزمان نجی بینک اکاؤنٹ سے فائدہ اٹھانے والے ہیں جب کہ پی ٹی آئی کا مقامی بینک میں اکاؤنٹ تھا اور مقدمے میں نجی بینک کے منیجر کو بھی نامزد کیا گیا ہے۔
ایف آئی آر کے متن کے مطابق نیا پاکستان کے نام پر بینک اکاؤنٹ بنایا گیا، بینک منیجر نے غیر قانونی بینک اکاؤنٹ چلانے کی اجازت دی اور ابراج گروپ آف کمپنیز نے 2.1 ملین ڈالر بینک اکاؤنٹ میں جمع کرائے۔
